२०८० चैत्र १६, शुक्रबार

मिसाइल परीक्षण याःगु बुखँय् सत्यता मदुगु चीनया दावी

कौलाथ्व चर्तुथी ११४१, कात्तिक २ मंगलबाः

चीनं थुगुसीया सुरुइ परमाणु क्षमता दुगु हाइपरसोनिक मिसाइल परीक्षण याःगु प्रतिवेदन अस्वीकार याःगु दु ।
 
थौंकन्हय् हे तिनि फाइनान्सियल टाइम्सय् पिदंगु उगु प्रतिवदेनय् सत्यता मदुगु धासें बेइजिङं खण्डन याःगु दु । वं मिसाइलया पलेसा अन्तरिक्ष यानया परीक्षण याःगु न्ह्यथंगु दु ।
 
फाइनान्सियल टाइम्सं वंगु अगस्टय् मिसाइल परीक्षण याःगु बुखँ पिथनेधुंकाः चीनं उकिया खण्डन याःगु खः । चिनियाँ विदेश मन्त्रालयं उगु बुखँया खण्डन यासें मिसाइल मखसें अन्तरिक्ष यान खःगु स्पष्टीकरण ब्यूगु खः ।
 
मन्त्रालयया प्रवक्ता झाओ लिजियानं बेइजिङय् नियमित प्रेस ब्रिफिङय् उगु परीक्षण नियति जूगु धयादीगु खः । वय्कलं उगु परीक्षण जुलाइलय् जूगु नं धयादिल । उगु घटनालिसें चीन व अमेरिका दथुइया द्वन्द्व हाकनं तच्वःगु दु ।
 
अमेरिकां धाःसा बेइजिङं सैन्य आधुनिकीकरणया नामय् थीथी परमाण्ुा ल्वाभः व अत्याधुनिक प्रविधिया विकास यानाच्वंगु तकं धाःगु दु ।
Categorized in अन्तर्राष्ट्रिय