मेयर चिरिबाबुया स्वार्थया हुनिं ज्यापु समाजयात संकट पूर्व अध्यक्षया कर्तुतय् समाज छाय् मौन ?
लहनान्युज | ञंलागा पारु ११४१, असोज ५ मंगलवाः
ज्यापु समाज यल, यलया परम्परागत ४० ज्यापु त्वाःया प्रतिनिधिमूलक संगठन खः । यल महानगरया मेयर चिरिबाबु महर्जन थुगु हे संगठनया छम्ह पूर्व अध्यक्ष तकं खः। थःगु हे संगठनया छम्ह पूर्वअध्यक्ष मेयर जूबलय् संगठनं मुद्दा, एजेण्डा, सरोकारया विषय छसीकथं सम्बोधन जुयावनीगु आम अपेक्षा दुगु खः। तर प्यदँ दुने जूगु छगू लिपा मेगु घटनाक्रमं संगठन बल्लानावनेगु पलेसा झन संकटय् तक्यनावंगु पुष्टि जुयावनाच्वंगु दु।
लिपांगु खुसी ज्यापु समाजया १०क्वःगु महाधिवेशन व २८ क्वःगु साधारणसभाया बन्द सत्र असोज १६ गतेतक्कया लागिं स्थगित याःगु दु। बन्दसत्र स्थगित याःगु थ्व निक्वःगु खुसी खः । भदौ २६ गते शनिबाः जूगु नेतृत्व ल्यज्याया ज्याधलखय् थ्यंबलय् असोज १ गते शुक्रबाः न्हिनय् १ ताः ईतक्कया लागिं स्थगित जूगु खः। स्थापनाया २७ दँतक्क थुकथं बन्दसत्र हे स्थगित याय्माःगु अवस्था थ्वयां न्ह्यः गबलें वःगु मदुनि।
x
वरियताक्रम कथं सहमतिइ नेतृत्व ल्यय्गु विधि समाजं स्थापित याःगु छगू सर्वमान्य परम्परा खः । थ्व हे परम्परां संस्थायात थौंतक बल्लाकावःगुलिइ सुयां पाःगु बिचाः दइमखु । तर थ्व हे परम्परायात त्वाःथलेत स्वःबलय् समाजय् अन्यौल स्थिति खनेदुगु खः। अन्यौल चीकेत कार्यसमितिं छवाःतक थीथी पक्षतलिसे लगातार याःगु खः। उलि कुतः यातं नं नेतृत्व ल्यज्याय् अनिर्णित व अन्यौलया स्थिति ब्वलंगुया ल्यूने मेयर महर्जनया नितान्त वयैक्तिक राजनीतिक महत्वाकांक्षा यक्व हदतक्क जिम्मेवार खनेदु। स्थानीय तहया न्ह्यःने वयाच्वंगु निर्वाचनय् मेयर महर्जन हाकनं उम्मेदवार जुइगु मनस्थितिइ दु।
कथंकदाचित थम्हं बिचाः यानाकथं उम्मेदवार जु हे जुल धाःसा समाजया सांगठनिक प्रभावया प्रयोग व पूर्वअध्यक्षया छवियात दुरुपयोग यानाः चुनाव त्याकेगु वय्कःया दुनेया दाउ दु । उकिया लागिं थम्हं धाःगु खँ न्यनीम्ह (यस म्यान) व चुनावय् हरहिसाबं ग्वहालि याइम्ह मनू माः। उकिया हे लागिं मेयर महर्जनं अनेक चलखेल यानाच्वनादीगु दु। सहमतिइ नेतृत्व ल्यय्गु परम्परायात त्वाःथलेत सतहलय् खनेदयाच्वंगु अनेक हर्कत थ्व हे चलखेलया हे ठोस अभिव्यक्ति खः।
स्वदँ न्ह्यः यल महानगरपालिका – ३ स्थित ऐतिहासिक पलेस्वां पुखूयात पुखूया रुपं विकसित याय्त स्थानीय नःत्वाःबासीं महानगरपालिकायात माग याःगु खः । व थासय् न्ह्याथे सां पार्किङस्थल दय्केगु मेयर महर्जनया हठ खः । ऐतिहासिक रुपं पुखू दुगु थासय् पुखूया रुपं विकास याय्माःगु माग तयाः स्थानीयं प्रदर्शन याःबलय् उकियात क्वत्यलेत मेयर महर्जनया हे आदेशय् दंगा प्रहरी परिचालन याःगु खः। नःत्वाः, समाज अन्तर्गत सदस्य ४० त्वाःमध्ये छगू खः । थःगु हे दुजः अन्र्तगत त्वाःया निहत्था नागरिकयात प्रहरी दमन यानाः क्वत्यलेत स्वःबलय् सम्पदा अभियन्तातय्गु साथय् स्थानीयं प्रतिकार याःगु खः।
थज्याःगु अवस्थाय् समाजया नायः चन्द्र महर्जनं दुजः त्वाः पक्षय् नवाय्गु पलेसा म्हुतुं मध्यस्थकर्ताया भूमिका निर्वाह याय्गु धासें प्रकारान्तरं मेयर महर्जनया हे पक्षय् भूमिका निर्वाह याःगु खः । ज्यापु समाजया हे ध्वाँय् ब्वय्काः प्रहरीं नःत्वाः पुखूया गेटया ताः स्थानीय मञ्जुरी अःखः चाय्कूगु खः। ज्यापु समाजयात मध्यस्थकर्ताया रुपं तयाः महानगरपालिका व स्थानीयवासी दथुइ सहमति महानगरपालिकां उल्लंघन यातं नं ज्यापु समाजया नेतृत्वपंक्ति म्हुतुप्वाः तिनाः च्वनाब्यूगु खः।
थगुने स्थानीयं स्वतःस्र्फूत रुपं रथ सालेगु झ्वलय् झडप जूगुलिइ मेयर महर्जन मुख्य दोषी खनेदु । झडप जुइधुंकाः मेयर महर्जनं रथ सालेत नगरपालिकाया ल्हाः मदुगु धासें ज्यापु समाजयात किकाःब्यूगु खः । थगुने ज्यापू समाजय् हे च्वनाः बुंगद्यःया रथ पूवंक हे यात्रा याय्गु धकाः भाषण बियाः फेसबुकय् लाःलाःथे च्वइपिन्त प्रतिकार याय्त तकं निर्देशन बिल । मेयर महर्जनया गैरजिम्मेवार, हठ व राजनीतिक स्वार्थया लागिं याःगु प्रयोगं ज्यापु समाज विवादय् लाःगु खः। समाजया एकतायात खण्डित यासें दलीयकरणया समग्र रुप खः, आःया संकट।
थ्व प्रति इलय् हे सचेत जुइमफुत धाःसा ज्यापु समाज राजनीतिक रुपं विभाजित जुइगु दलीयकरण व गुटगत खेल जुइगु पक्का दु । थुकियात पनेत आःया कमजोरीप्रति निर्मम तवरं समीक्षा याय्माः।
थःगु दुजः त्वाःप्रति स्वयां मेयरप्रति ज्यापु समाज छाय् जवाफेदी मदु ? मेयरं सहमति उल्लंघन यात नं समाजया नेतृत्वपक्ति छाय् सुम्क ? पुखू दय्केगु स्थानीयया आन्दोलन स्यंकेगु मेयर महर्जनया योजना ज्यापु समाज छाय् दुरुया साक्षी जूगु ? ताः तछ्याय्गु झ्वलय् समाजया ध्वाँय् ब्वय्काः सुयात तिबः ब्यूगु ? थुगु न्ह्यसःत अझं नं बन्दसत्रय् दनाच्वंगु दनि । गुकिया लिसः समाजया नेतृत्वपक्तिं बी फयाच्वंगु मदुनि ।
