म्यानचेस्टर युनाईटेड च्याम्पियन्स लिग फुटबलया नकआउट चरणय् दुहाँवंगु दु ।

वंगु चान्हय् जूगु कासाय् स्पेनिस क्लब भिल्ला रियलयात २गू–०या गोल अन्तरं बुका युनाईटेड लिपांगु १६गूलिइ थ्यंगु खः । भिल्लाया मैदानय् युनाईटेडयात त्याका बिइत क्रिस्टियानो रोनाल्डो व जाडोन सान्चों छगू छगू गोल याःगु खः ।

कासाया न्हापांगु हाफ गोल मजूसें क्वचागुलिइ निगूगु हाफया ७८ गूगु मिनेटय् रोनाल्डाें गोल याना टोलीयात अग्रता बिउगु खः । थुगु गोललिसें रोनाल्डों व्यवसायिक कासा करिअरय् ७ सः व ९९ गू गोल पूवंकुगु दु  ।

कासाया ९० गूगु मिनेटय् सान्चों गोल याना युनाईटेडयात २गू–०या गोल अन्तरं त्याकाबिउगु खः । कासा त्यागु लिसें पुचः एफया युनाईटेडं ५गू कासाय् १०गू ल्याः मुना शीर्ष थासय् थ्यंगु दु ।

भिल्ला धाःसा ७ गू ल्याः लिसें निगूगु थासय् दु ।

Categorized in कासा