म्येहालामि सलिल सुन्दर तुलाधरया 'यः मां' म्ये सार्वजनिक जुल
ञंलागा ३० ११४०(असोज १) बिहीवाः
म्येहालामि सलिल सुन्दर तुलाधरया नेपालभाषाया म्ये ‘यःमां’ या म्युजिक भिडियो सार्वजनिक जूगु दु । म्येहालामि तुलाधरं थः मदुम्ह मां रुप शोभा तुलाधरयात समपर्ण याना दयेकूगु म्येया भिडियो हाइलाइट्स नेपालया युट्युब च्यानलपाखें सार्वजनिक जूगु खः ।
थुगु म्ये म्येहालामि तुलाधरं मदुम्ह मां मदूगु ४५ न्हुया पुण्य तिथिस संगीतवद्ध यायेगुलिसें रेकर्ड याःगु खःसा म्येयागु म्युजिक भिडियो दछिया पूण्य तिथिया दिं लाकाः सार्वजनिक याःगु खः ।
सार्वजनिक म्येया म्यूजिक भिडियो मन्जु श्रेष्ठ, दिपक मगर व सर्निका राजोपाध्यायं अभिनय यानादीगु दु । मतिना प्रोडक्सनं तयार याःगु म्यूजिक भिडियोया निर्देशन नांजाःम्ह म्यूजिक भिडियो निर्देशक विजु कर्माचार्यं यानादीग दु ।
छायांकन अमर चित्रकारं याःगु खःसा सह निर्देशन व भिएफएक्स महेश्वर श्रेष्ठया दु ।
मांया गुण चित्रण यानाः संसारय् न्ह्याम्हेसित नं दक्कले माया याइम्ह देवी समानया मांया वियोग गुलि दुःखदायी जुइ धैगु भावना कःघानाः तयार यानातःगु थूगु दु ।
म्येया संगीत संयोजन अन्जन श्रेष्ठं याःगु दुसा रण बहादुर ताम्राकारं म्ये च्वज्याय् ग्वाहालि याःगु दु ।
थूगु म्येया हालामिलिसें संगीतकार व रचनाकार सलिल सुन्दर तुलाधरं थ्वयां न्ह्यः नं नेपाली संगीत लागाय् ड्याम ड्याम थें जाःगु लोकंह्वाःगु म्ये बियादीधुंकूगु दुसा नेपाली संकिपा निजर्लाय् भाले मोटर, चोखो मायामा तिमी नै हौ, थें जाःगु म्ये नं हालादीगु दु ।
अथेहे नेपाल भाषा संगीतय् छपलाः एल्बम, मखं त्वाःया कायमचा नापं मेमेगुन लोकंह्वाःगु म्ये हालादिधुंकुगु दु ।
म्युजिक भिडियो क्वय् स्वयादिसँ :
