यंगालय् शहिद धर्मभक्त माथेमा पार्क
जहानियाँ राणा शासन विरुद्धको क्रान्तिइ जीवन बलिदान यानादीम्ह शहीद धर्मभक्त माथेमा जन्म जूगु यंगाः त्वालय् वय्कःया हे नामं छगू न्हूगु कथंया पार्क दयेकूगु ज्या जुगु दु । येँ महानगरपालिकां दयेकूगु थुगु पार्क थ्वहे वइगु शहीद दिवस कुन्हु येँ मनपाया मेयर विद्यासुन्दर शाक्यं उलेज्या याइगु ग्वसाः दु ।
 
पार्कय् शहीद धर्मभक्त माथेमाया म्हं छम्हं दुगु छगू झ्वाता नं पलिस्था जुइ । पार्क दुने झ्वाता धस्वाके धुंकूगु दुसा आः शहीद दिवस कुन्हु उलेज्या जक जुइ ल्यं दनि ।  
 
तर थ्व पार्क मेमेगु पार्क थें केवल झासु लनेगु पार्क जक धाःसा मखु । थ्व पार्कया क्वय् छगः तग्वःगु भूमिगत लः ट्यांकी नं दइ गुकियात उगु लागाय् गनं छेँ मिं नइगु थेंज्याःगु तःधंगु घटना जुल धाःसा प्रयोग याये फइ । 
 
२३ वडाया ओमबहाः, यंगाः त्वालय् आपालं चीधंगु गल्लि, चुक, बहाः, बहीत दु । मालीगु इलय् अन दमकल नं यंके फइ मखु । उकिं अज्याःगु थासय् गनं छेँ मिं नल धाःसा तुरुन्त हे मि स्यायेगु लागिं उगु ट्यांकीया लः छ्यलेगु ताः तयाः उगु ट्यांकी दयेकूगु खः । 
 
थ्व लः ट्यांकीइ ३० हजार लिटर लः न्ह्यं । २३ वडाया वडा अध्यक्ष मचाराजा महर्जनं कनादी कथं थुकी वाति लः मुंकाः जायेकेगु जुइ । थ्व ट्यांकीया पाइपय् मेथाय् यंके जिउ कथं मेगु पाइप स्वानातःगु दइ । थ्व पाइपया नापं वडापाखें छगः ल्ह्वनाः यंके जिउगु पम्पया नं व्यवस्था यानातःगु दु । 
 
थ्व पम्पं ९–१० तल्ला तक लः छ्वाके फइ । पार्कय् च्वंगु ट्यांकीइ लगातार १ घन्टा तक छ्वाके फइगु लः मुनाच्वंगु दइ । थुकिया नापनापं उगु लागाया थीथी चुक व बहालय् मेगु स्वंगः ति चिचीग्वःगु ट्यांकी नं दयेकेगु ग्वसाः दु । यदि पार्कया तग्वःगु ट्यांकीया लखं मगात धाःसा थ्व चिचीग्वःगु ट्यांकीया लः नं छ्यले फइगु खँ नं वडा अध्यक्ष महर्जनं कनादिल ।  
विपद्या इलय् छ्यले फइगु लः ट्यांकी नापं दुगु थज्याःगु पार्क नेपाःया हे न्हापांगु खः ।
 
येँ महानगरपालिकां करिब ५० लाख तकाया लागतय् थ्व पार्क दयेकूगु खः । पार्कया डिजाइन यानादीम्ह इन्जिनीयर लिसें कामपा सहरी योजना आयोगया दुजः सजिव शाक्यया कथं पार्क दुने परम्परागत नेवाः शैलीया छगू सतः नं दइ गन मनूत याउँक झासु लने फइ । अन दुने छगू ई–ट्वाइलेट नं दइ । पार्क च्वंगु ट्वाइलेट, क्यब व मेमेगु यचुपिचुया ज्या यायेत वहे ट्यांकीया लः छ्यलेगु याइ । थ्वहे वइगु माघ १० गते उगु ट्यांकीया लः छ्यलाः मि स्यायेगु विधिया छगू परीक्षण ज्याझ्वः नं जुइत्यंगु दु ।  
 
 
पार्क दुने शहीद धर्मभक्त माथेमाया म्हं छम्हं दुगु शालीक छगू नं दइ । कलाकार मदन तुलाधरं उगु शालीक दयेकादीगु खः । माघ १६ गते शहीद दिवस कुन्हु उगु शालीकया नं उलेज्या जुइ । वि.सं. १९६६ आश्विन ९ गते ओमबहालया नःबहिली जन्म जुयादीम्ह धर्मभक्त माथेमायात ३१ दँया वैंशय् वि.सं. १९९७ माघ १३ गते येँया सिफलय् फाँसी बिउगु खः । 
 
वय्कलं जोरगणेशस्थित थः हे निनिया छेँय् भेला यासें वि.सं. १९९३ सालय् नेपाःया न्हापांगु राजनीतिक संगठन नेपाल प्रजापरिषद् गठन यानादीगु खः । वय्कलं तत्कालीन जुजु त्रिभुवनया व्यायाम प्रशिक्षक जुयाः जुजुयात नापं प्रजापरिषद्या दुजः दयेकुसें प्रजातन्त्र स्थापनाया लागिं प्रतिबद्ध यानादीगु खः ।