यलय् उत्कृष्ट मचा पुचः घोषणा
नृपेन्द्रलाल श्रेष्ठ | दिल्लाथ्व चर्तुदशी ११३९ (जुलाई १५ २०१९)
यल महानगरपालिकाया समाज कल्याण महाशाखाया ग्वसालय् यल महानगर दुनेया उत्कृष्ट मचा पुचःया घोषणाया नापनापं सिरपाः लःल्हात ।
यल नगर दुने १२०गू बाल क्लब मध्ये ३५गू क्लबं ब्बति काःगु खः । उगु ज्याझ्वलय् मूपाहाँकथं झायादीम्ह यल महानगरपालिकाया सामाजिक समितिया संयोजक दिनेश कार्कीं त्रिपद्मा बाल क्लव न्हाप, नःत्वाः मचा पुचः ल्यू व भाष्कर बाल क्लव लियांल्यू लाःगुलिं दसिपौ, स्पीकर नापं मतिनाया चिं लःल्हानादिल ।
अथेहे, श्री चण्डी आदर्श सरल प्रकृति क्लव व श्रमिक शान्ति प्रकृति क्लबयात हःपाः सिरपाः लाःगु खः ।
समाज कल्याण महाशाखाया प्रमुख बाबुराजा महर्जनया सभाध्यक्षतायु जूगु उगु ज्याझ्वलय् प्रमुख प्रशासकीय अधिकृत प्रेमप्रसाद भट्टराई, सुप्रभा शाक्य, सरिता महर्जन व ज्ञानीशोभा महर्जनपिं पाहाँकथं झायादीगु खः ।
