येँयाःयात अन्तर्राष्ट्रियस्तरय् म्हसीकेगु कथं हनेत्यनागु : मेयर शाक्य
नृपेन्द्रलाल श्रेष्ठ | ञलाथ्व द्धितिया ११३९ (सेप्तेवर १ २०१९)
येँ महानगरपालिकां पूर्वकुमारी, पूर्व भैलःद्यः व पूर्व गणेद्यःयात बिया वयाच्वंगु मासिक भत्ता अप्वय्कूगु दु । अथे हे, जीवित कुमारी व जीवित कुमारीया सुसाकुसा याइपिं चिताइदारपिनिगु नं मासिक भत्ताय् महानगरपालिकां थकाःगु दु ।
पूर्व कुमारी, भैलद्यः व गणेद्यःयात श्रीपद भत्ता इनेज्या व ईन्द्रजात्रा व्यवस्थापन समितियात अनुदान बीगु नितिं ग्वसाः ग्वःगु ज्याझ्वलय् येँ महानगरपालिकाया प्रमुख विद्यासुन्दर शाक्यं थुकथं घोषणा यानादिसें भत्ता लःल्हानादीगु खः ।
आः प्रत्येक महिना पूर्व कुमारीं १५द्वःतक व पूर्व गणेद्यः व भैलद्यवं १२÷१२द्वःतका प्राप्त याइगु जूगु दु । चिताइदारं धाःसा १५द्वःतका प्राप्त याइ । थ्व स्वयां न्ह्यः पूर्व भैलद्यः व गणेद्यवं ८÷८द्वःतका व पूर्व कुमारी व चिताइदारं १०÷१०द्वःतका कया वयाच्वंगु खः । अथे हे म्वाःद्यः कुमारी व चिताइदारं २५÷२५द्वःतका प्राप्त याना वयाच्वंगु खःसा आवंनिसें ५०÷५०द्वःतका
प्राप्त याइगु जूगु दु । थौंकन्हय् पुलांपिं कुमारी ९म्ह, पुलांपिं ।
अथे हे, येँ महानगरपालिकां ईन्द्रजात्रा व्यवस्थापन समितियात १३गू लख ९३द्वः न्हय्सः तकाया चेक लःल्हाःगु दु । महानगरपालिकां उगु समितियात २०७५सालया धेबा लःल्हाःगु खः । २०७५साल न्ह्यः तक येँयाःया नितिं केन्द्र सरकारं १४गू लखतका व महानगरपालिकां १०गू लखतका ग्वाहालि याना वयाच्वंगु खः । आः फुक्क धेबा महानगरपालिकां ग्वाहालि याइगु जूगु दु ।
अथे हे, येँयाः न्ह्याकेगु नितिं आकिवंनिसें कोष नीस्वनेगु व उकिं हे जात्रा याय्गु तकं तयारी याःगु महानगरपालिकां जानकारी ब्यूगु दु । संस्कृति तथा पर्यटन मन्त्रालयपाखें २गू करोड, महानगरपालिकापाखें २गू करोडतका व गुथि संस्थानपाखें १गू करोडतका यानाः मुक्कं ५गू करोडतकाया अक्षयकोष पलिस्था याय्गु विषयस सहलह न्ह्याःगु धयादिसें प्रमुख शाक्यं थुकिया नितिं कार्यविधि दय्काः याकनं हे कोष पलिस्था याय्गु नं धयादिल । कोष पलिस्था याय्गु विषयस राष्ट्रपति विद्यादेवी भण्डारीतकं सकारात्मक जूगु प्रमुख शाक्यया धापू दु ।
थ्व हे झ्वलय् संस्कृति व परम्परा संरक्षण याय्गु खँय् थः दत्तचित्त जुयाः न्ह्यज्यानाच्वनागु खँ धयादिसें प्रमुख शाक्यं परम्परा न्ह्याकेगु खँय् छुं नं म्हो मयाय्गु प्रमुख शाक्यं बचं बियादिल । संस्कृति, परम्परा नेपाःमिपिनिगु अमूल्य निधि जूगु वय्कःया धापू खः ।
प्रमुख शाक्यं थुगुसी येँयाःयात अन्तर्राष्ट्रियस्तरय् म्हसीकेगु कथं हनेत्यनागु जानकारी बियादिल । ‘थीथी देसया मेयर व प्रतिनिधिपिन्त येँयाः स्वय्गु नितिं सःताःगु दु । थ्व उमित नेपाः म्हसीकेगु ह्वःताः नं खः ।’ प्रमुख शाक्यं धयादिल ।
