येँया प्रमुख शाक्यपाखें पञ्जरां कयादिल
लहनान्यूज | ने.सं. ११३९ गुंलागा त्रयोदशि (२८ अगष्ट, २०१९), बुधवाः
येँ महानगरपालिकाया प्रमुख विद्यासुन्दर शाक्यं थौं पञ्जरांय् ब्वति कयादिल ।
पञ्जरां हनेगु झ्वलय् प्रमुख विद्यासुन्दर शाक्य दान कयादीत थीथी विहारय् झायादीगु खः । प्रमुख शाक्यलिसें महानगरपालिकाया मेमेपिं शाक्य, बज्राचार्य वडाध्यक्षपिनिगु ब्वति दुगु खः ।
पञ्जरां दानलिसे सम्बन्धित नखः खः । पञ्जरांया दिनस परम्परागत विहारया शाक्य, बज्राचार्यपिन्त बुद्धया उपासककथं हनाबनालिसें लसकुस यानाः सत्कार यासें अत्र दान बीगु खः । प्रमुख शाक्यं नं दान कयादीत झायादीपिं मेमेपिं शाक्य, बज्राचार्यपिनिगु पुचःलिसें लाइनय् च्वनाः सर्वसाधारणपाखें दान ग्रहण यानादिल । अत्र धाय्बलय् छ्व, जाकि, चि, ग्वःमाय्, कःनि, कय्गू व खीर खः ।
लिपांगु पुस्तां थुगु नखःया महत्व व सन्देशयात ल्वःमंका वनाच्वंगु अवस्थायात बिचाः यानाः थुकियात पुनःजागरण यायेत थःम्हेस्यां ब्वति कयागु जानकारी बियादिल । ‘मेयर पद ला
अस्थायी खः । जनतालिसेया स्वापू धाःसा मेयर जूसां मजूसां माः । मेयर जुल धाय्वं थःगु भाषा, धर्म व संस्कृतियात ल्वःमंकेमज्यू धकाः ब्वति कयागु खः ।’ प्रमुख शाक्यं धयादिल ।
थुगु दिंयात ‘दान दिवस’कथं मान्यता बीमाःगु बहस जुयाच्वंगु इलय् येँ महानगरपालिकाया प्रमुख शाक्य थः हे ब्वति कयादीगुलिं थुगु बहसयात न्ह्यःने यंकेत तिबः दुगु नेपाल परम्परागत बौद्ध धर्म संघया बज्राचार्य गुरुजुपिन्सं धयादीगु दु ।
पञ्जरांया दिनस पृथ्वी बूगु अत्र व सिसाबुसा आदि न्याताजि बस्तु दान याइगु जूगुलिं ‘पञ्जरां’ धाःगु खः । पञ्जरायात खस भासं ‘पञ्चदान’ धाइ । थुगु नखः बुद्ध दर्शनया दान पारमितालिसें स्वापू दु । दान भावनां समाज सुधार, दुर्गतिया निवारण नापं शान्ति जुइगु जनविश्वास दु ।
नखः हनेगु झ्वलय् थीथी चुकय् दिपंकर बुद्ध, बसुन्धरा व करुणामयया मूर्तियात पूजा याइ । दँय्दसं गुंलागा त्रयोदशिया दिनस थुगु नखः येँ व ख्वपय् हनीगु खः । यलय् थुगु नखः गुंलाथ्व अष्टमि कुन्हु हनीगु खः । थीथी महाविहारया दिपंकरया थीथी वसः व तिसां छायेपियाः छन्हु न्ह्यः तयातइ । अथे हे, थ्व नखः स्वनिगःलिसें भ्वँत व धौख्यलय् नं हना वयाच्वंगु दु ।
पञ्जरांया झ्वलय् दान यायेगु परम्परा लिच्छवी जुजु बृषदेवया पालंनिसें हे दु धइगु थीथी अभिलेखय् न्ह्यथनातःगु दु । मानदेव, शिवदेव, अंशुबर्मालिसेंया लिच्छवी जुजुपिनिगु इलय् जक मखुसे मल्लकालय् नं थुगु परम्परायात थीथी गुथिया व्यवस्था यानाः थुगु नखःया व्यवस्थापन यानातःगु खः ।
Categorized in राष्ट्रिय
