येँ महानगरं नेपाल भाषाया न ब्बकेगु ब्यवस्था याइगु
नृपेन्द्रलाल श्रेष्ठ | तछलागा द्धादशी ११४०,असार ४ बिहीवाः
थौं येँ महानगरपालिकाया आर्थिक वर्ष २०७७÷०७८ या नीति तथा कार्यक्रम सार्वजनिक याःगु दु । राष्ट्रियसभा गृहय् येँ महानगरपालिकाया मेयर बिद्यासुन्दर शाक्यं आर्थिक वर्ष ७७÷०७८ या नीति तथा कार्यक्रम सार्वजनिक यानादिगु खः । थौंया नीति तथा कार्यक्रमय् नेपाल भाषाया स्थानीय पाठ्यक्रम दयेका लागु याइगु ज्याझ्वः न निति तथा कार्यक्रमय् हःगु दु
मेयर शाक्यं महानगरपालिकां जीवन उपयोगी, व्यावसायिक एवं प्रविधियुक्त पूर्वाधार सहित नैतिक तथा मनोवैज्ञानिक शिक्षाय् जोड बिया स्कूलया समग्र शैक्षिक गुणस्तरय् सुधार यायेगु नीति हःगु दु । ‘महानगर दुने स्कूलय् गुणस्तर सुधार याना ई कथं शिक्षाविद् पि दुथ्याका एकीकृत शिक्षा व्यवस्थापन योजना तर्जुमा समिति गठन याना शिक्षा योजना ज्याझ्वः हःगु दु । बाल शिक्षा, प्राथमिक तहया शिक्षा, आधारभूत तहया शिक्षा व माध्यमिक तहया शिक्षायात विशिष्टिकृत याना यंकेगु त्यःगु दु,’ नीति तथा कार्यक्रम सावजनिक यानादिसे मेयर शाक्यं, ‘विद्यालय शिक्षाय् नेपाल भाषाया स्थानीय पाठ्यक्रम दयेका लागु याइगु ज्याझ्वः न निति तथा कार्यक्रमय् हःगु दु । थजाःगु निर्माण याइगु पाठ्यक्रमय् स्वनिगःया भाषा, रहन सहन, संस्कृति, सम्पदा लगायत नैतिक शिक्षायात तक कःघाइगु जुगु दु ।’
महानगरपालिकां स्कूलय् ब्बनेगु बिचय् त्वतुपिनिगु लागि मनोबल थकायेगु आवश्यक पूर्वाधार निर्माण याना बालमैत्री शिक्षण पद्धतियात अबलम्बन याइगु, स्थानीयबासी, जेहेन्दार, गरिब, विपन्न तथा अपाङ्गता जूपि मस्ततयत आवश्यक कथं पाठय्पुस्तक, पाठ्यसामाग्री व पोसाक लगायतया सामाग्री उपलब्ध याका अभिभावकत्व प्रदान यायेगु ज्यायात निरन्तरता बिइगु ज्याझ्वः हःगु दु ।
येँ महानगरपालिकां ‘समृद्धिया लागि सहकारी अभियान’ यात ताः लाकेगु लागि साना तथा मझौला व्यबसायय् संलग्न मनू वा पुचः सहकारीइ आबद्ध याना आत्मनिर्भर दयेकेगु नीति महानगरपालिकां काःगु दु । ‘अनौपचारिक क्षेत्रय् संलग्न मिसा, न्हिया न्हिथं ज्या याइपि मजदूरपिन्त सहकारीइ आबद्ध याना विशेष ज्याझ्वः या ब्यबस्था याइगु,’ नीति तथा कार्यक्रमय् तया तःगु दु,’ ‘तरकारी, फलफूल, घरेलु खाद्य उद्योग, सरसफाई क्याफे व रेष्टुरेण्ट, मनोरञ्जन, प्राविधिक, पेशागत शिल्पी, स्वास्थ्य क्षेत्र समेतया आधारित उपभोक्ता, श्रमिक व उत्पादक सहकारी संस्था प्रबद्र्धनय् जोड बिःगु दु ।’
‘विषम परिस्थितिय् जीवन निर्वाहया लागि पारिश्रमिक कार्यविधि, २०७७ यात प्रभावकारी रुपं कार्यान्वयन याइगु निति हःगु दु,’ नीति तथा कार्यक्रमय् ‘कोभिड–१९ महामारीं लघु, घरेलु तथा साना उद्योगय् याःगु प्रभावयात सम्बोधन यासे रिभल्भिङ फण्डया स्थापना याना कार्यविधियो आधारमा सहुलियत दरय् ऋण प्रदान याये त्यःगु दु । महामारी विरुद्ध प्रतिकार्यया लागि अध्ययन, अनुसन्धान, आविष्कार यायेत थीथी सरकारी, गैर सरकारी संस्थापि नाप सहकार्य याइगु ज्याझ्वः दु ।’
