यौनहिंसा व यौन दुव्र्यवहार विरुद्ध कडा कानून आवश्यक
जुजुमान महर्जन
थौंकन्हय् यौन हिंसा, यौन दुव्र्यवहार, घरेलु हिंसा अप्वया वनाच्वंगु दु । छन्हु निन्हुया दुने हे आपालं थासय् यौन हिंसा व यौन दुव्र्यवहारया घटना सार्वजनिक जुयाच्वंगु दु । छुं दिं न्ह्यः जक ख्वपया चाँगु नारायण नगरपालिका–८ लिवालीइ छम्ह मिसामचायात मंकाः बलात्कार जूगु घटना पिहाँवःगु दुसा आरोपित मनूत चालक व सहचालकयात ज्वनेधुंकूगु दुसा शंकास्पद मनूत मालेगु ज्या जुयाच्वंगु दु ।
अथे हे, विराटनगरय् होम ट्यूसन ब्वंकाच्वंम्ह छम्ह शिक्षकयात मिसामचायात बलात्कार याःगु द्वपनय् प्रहरीं ज्वंगु दु । जिल्ला प्रहरी ज्याकू मोरङ्गय् न्यादँ दुम्ह मिसामचायात बलात्कार याःगु द्वपनय् उजुरी लाय्वं होम ट्यूसन ब्वंकाच्वंम्ह उम्ह शिक्षकयात ज्वंगु खः । मेगु घटना स्वय्गु खःसां नं सुदूर पश्चिम जिल्ला कञ्चनपुरया लालझाडी गाउँपालिकाय् झिंन्यादँ दुम्ह मिसामचायात यौन दुव्र्यवहार याःगु द्वपनय् स्थानीय ५५दँ दुम्ह मिजंयात ज्वंगु दु ।
थ्व स्वयां न्ह्यः बझाङ्गय् दलित मिसामचायात बलात्कार याःगु घटना क्वमलानीबलय् हे थजाःगु आपालं घटना सार्वजनिक जुजुं वयाच्वंगु दु । बझाङ्गया मिसामचायात घटनायात कयाः सभामुख अग्नीप्रसाद सापकोटायात अनया सांसदतसें ध्यानाकर्षण पौ लःल्हासें दोषीयात याकनं म्हसीकाः कडा स्वयां कडा कारवाही याय्त इनाप याय्धुंकूगु दुसा थुकियात कयाः संसदया महिला तथा सामाजिक समितिं बलात्कारीयात मृत्युदण्ड बीगु कानूनयात कयाः अध्ययन याय्त सरकारयात निर्देशन तकं बीधुंकूगु दु ।
समितिं बलात्कार अले बलात्कार लिपा जुइगु हत्यालिसेंया जघन्य अपराधयात सम्मानपूर्वक म्वाय्दइगु अधिकारया नितिं गम्भीर हाथ्याः जूगु धासें मिसामचालिसें जिथीपिन्त जुइगु बलात्कारया घटना जूगुया मू हुनिं कमजोर कानून व दण्ड सजाँय व थजाःगु घटना अःपुक्क हे गैरकानूनीकथं व्यवस्थापन जुइगुलिं थथे जूगु धयाच्वंगु दु । थ्व हे हुनिं बलात्कारीयात मृत्युदण्ड बीगु, लिङ्ग छेदन याय्माःगु थेंजाःगु सः थ्वःगु खःसा थुकियात कयाः हे अध्ययन याय्त सरकारयात निर्देशन ब्यूगु खः ।
बलात्कारया घटनाय् अप्वः याना १६दँया क्वय्यापिं मिसामस्त अप्वः पीडित जुयाच्वंगु दुसा पीडकत स्वय्गु खःसा ल्याय्म्ह, ज्याथःपिंलिसें पदय् च्वनाच्वंपिं जनप्रतिनिधि धाःपिं तकं दुथ्यानाच्वंगु दु । तर थजाःगु घटनायात कयाः पारिवारीक इज्जत(?)लिसे स्वानाः गैरकानूनीकथं मिलापत्र यासें घटना सामसुम याय्गु ज्या आःतक नं जुयाच्वंगु दु । थुकिंयानाः पीडक अझ उत्साहित जुइगु जक मखु, उमिसं मेपिन्त बलात्कारलिसें हत्यातकं याय्त लिमच्यूगू घटना बझाङ्गया सम्झनाया घटनां नं उला बीधुंकूगु दु । उकिं थजाःगु हिंसायात कयाः सकलें गम्भीर जुइमाःगु खनेदु । ता कि थजाःगु घटना याय्त स्वइपिन्सं ख्वाउँगु दिमागं तक्वःमछि हे बिचाः याय्माली ।
तर राज्य व्यवस्था तथा सुशासन समितिया मुँज्याय् गृहमन्त्री रामबहादुर थापां नेपालय् बलात्कारया घटना अप्वया वनाच्वंगु स्वीकार यानादीसां हलिंया मेमेगु देशया तुलनाय् नेपाःया अवस्था चिन्ताजनक मजू धकाः अभिब्यक्ति बियादीगुलिं बलात्कारीयात हतोत्साही याय्कथंया कडा कानून वइगु खँय् अझं नं आशंका याय्गु थाय् दनि ।
