राससया प्रधान सम्पादक शाक्य सम्मानित
नृपेन्द्रलाल श्रेष्ठ | थिंलाथ्व एकादशि ११३७ (डिसेम्बर १० २०१६)
१३ वडा ग्वाहालि पुचःया ग्वसालय् थौं येँय् न्हूदँ नेपाल सम्वत ११३७या लसताय् भिन्तुना कालबिल ज्याझ्वः जूगु दु ।
भिंतुना ज्याझ्वलय् १३ वडा दुनेया विशिष्ट व्यक्तित्वपिन्त हंगु खः । उकिया झ्वलय् राष्ट्रिय समाचार समितिया प्रधान सम्पादक राजु शाक्ययात हंगु दु ।
शाक्ययालिसें अन्तर्राष्ट्रिय धावक वैकुण्ठ मानन्धर व समाजसेवी बेदराज शर्मा रुपाखेतीयात नं हंगु खः । सम्मानित व्यक्तित्वपिन्त ज्याझ्वःया मू पाहां जनकवि दुर्गालाल श्रेष्ठं हनापौ लःल्हानादिल ।
ज्याझ्वलय् जनकवि श्रेष्ठया लिसें समाजसेवी प्रा.डा.तुलसीनारायण श्रेष्ठ, आदिवासी जनजाति वकिलपिनिगु संस्था लाहुर्निपया छ्यान्जे शंकर लिम्बु, राजनैतीक विश्लेषक सीके लाल, कृष्णभक्त हाछेथुं राज्यं आदिवासी जनजातिया अधिकार सुनिश्चित यायेमाःगु खँय् बः बियादीगु खः ।
ज्याझ्वःया उलेज्या जनकवि श्रेष्ठं त्वाःदेवाय् मत च्याकाः यानादिल । ज्याझ्वः पुचःया नायः जीतबहादुर मानन्धरया सभानायकय् जूगु खः ।
स्वनिगलय् नेवाःत अल्पमतय् मलाः
लाहुर्निपया छ्यान्जे शंकर लिम्बुं सरकारं देशया जनताया नयेगु नसा, च्वनेगु बाय् व पुनेगु लंया सुनिश्चिता यायेमाःगु अवस्थाय् सडक विस्तारया नामय् राज्य हे स्वनिगःया आदिवासी नेवाःतयगु बाय् लाका कयाच्वंगु धयादिल । वर्तमान संविधानं नेवाःलिसें थारुतयगु अस्तित्वयात संकटय् लाकूगु लिम्बुया धापू खः ।
अथे हे जनकवि दुर्गालाल श्रेष्ठं नेवाःत च्यः बुद्धि जुयाः झं झं ल्यूने लानावनाच्वंगु धयादिल । आः नं च्यः बुद्धि त्वःताः अधिकार प्राप्तिया नितिं न्ह्यज्याःसा थःगु अधिकार कायेफइगु खँ श्रेष्ठं कुलादिल ।
व हे कथं, राजनैतीक विश्लेषक सीके लालं मोहनिया इलय् सकलें थःथःगु छेँय् वनीगु इलय् स्वनिगःया वास्तविक जनसंख्या खनेदइगु धयादीगु खः । भाजु सीके लालं नेपालया जनगणनाया तथ्यांक स्वयेबलय् स्वनिगलय् नेवाःत अल्पमतय् लाःगु खनेदुसां मतदाता नांधलः व नागरीकताया आधारय् स्वयेबलय् नेवाःत अल्पमतय् खनेमदुगु प्रष्ट यानादिल ।
