म्येहालामि रोजी डंगोल श्रेष्ठया सलय् नेपालभाषाया यच्चुगु सर्गः म्येचाः पितब्यज्या जूगु दु । नेपाल पर्यटन बोर्डय् जूगु ज्याझ्वलय् वरिष्ठ म्येहालामि प्रेमध्वज प्रधान व जगमोहन वामिं म्येचाः पितब्वज्या यानादीगु खः । पूर्णकाजी ज्यापुं च्वयादीगु म्ये, जुगल डंगोलं लसय् हनादीगु खःसा वय्कःया हे संगीत संयोजनय् थुगु म्येचाः पिदंगु खः ।

 

थुगु म्येचाकलय् ‘मस्यू जितः छुजू, छुजू’, ‘यच्चुगु सर्गः’, ‘चुलि जाया वइगु’ दुथ्याःसा मदनकृष्ण श्रेष्ठनाप ‘मोहनि तया ला’ व सानुबाबु महर्जननाप ‘मतिना फसं’ ज्वःम्ये दुथ्याः । आर्टोम्यूज स्टुडियोय् रेकर्डिङ्ग जूगु म्येचाःया पिकाकः म्येहालामि मय्जु रोजीया जहान बालचन्द्र श्रेष्ठ खः ।

 

म्येचाः पितब्वज्याया मूपाहाँ रक्षामन्त्री भिमसेनदास प्रधानं म्येचाः पिथनेतः तिबः बियादीपिं, ग्वाहालि यानादीपिन्त मतिनाया चिं देछासें हनादीगु खःसा थःगु नुगः तय्गु झ्वलय् वय्कलं म्ये नं हालाः न्यंकादीगु खः ।

 

ज्याझ्वलय् सुरोज महर्जनं निर्देशन यानादीगु शंकर महर्जनया छायाँकन, सनम श्रेष्ठं समा यानादीगु व म्येहालामि रोजीनापं सुरमा डंगोल, प्रमोद महर्जन, प्रदिका महर्जन, श्रिया महर्जन, श्रृष्टि शाक्य, रिलिमा महर्जनं अभिनय यानादीगु ‘मस्यू जितः छुजू छुजू’ या म्यूजिक भिडियो नं क्यंगु खःसा रोजीं थुगु म्येचाकलय् दुथ्याःगु ‘चुलि जायावइगु’ म्ये न्यंकादीगु खः ।

 

ज्याझ्वलय् नेपाल संगीत तथा नाट्य प्रज्ञा प्रतिस्थानया प्राज्ञ परिषद् दुजः माधव प्रधान, लोकगायक रत्न बहोशी, वरिष्ठ म्येहालामि जुजुकाजी रंजित, संगीतकार राजु सिँह, वरिष्ठ फोटोग्राफर राजभाई सुवाल, वरिष्ठ सिने पत्रकार विजयरत्न असंबरे, म्येच्वमि वि. नन्द वैद्य पाहाँकथं दबुलिइ च्वनादीगु खः । म्येचाकलय् दुथ्याःगु म्येया समालोचना वरिष्ठ संगीतज्ञ धनबहादुर गोपालीं यानादीगु खः ।

 

सुरजवीर बज्राचार्यं न्ह्याकादीगु म्येचाः पितब्वज्याय् पाहाँपिन्त ब्याज देछायेगु ज्या म्येहालामि मय्जु रोजीया म्ह्याय् अन्तरा मानवी श्रेष्ठं यानादीगु खः सा ज्याझ्वः ग्वसालय् ग्वाहालि नेपाः डान्स एकेडेमीं याःगु खः ।

 

Categorized in मनोरन्जन