२०८० चैत्र १६, शुक्रबार

लक्ष्मण राजवंशी नेपाः पार्टिपाखें निष्काशित

लहनान्यूज | पोहेंलागा षष्ठी ११३७ (जनवरी १९ २०१७)

नेपाः राष्ट्रिय पार्टिपाखें व्यवस्थापिक संसदय् सांसद जुयाच्वंम्ह लक्ष्मण राजवंशीयात पार्टिपाखें निष्काशन याःगु दु ।
 
थौं च्वंगु पार्टिया केन्द्रिय समितिया मुँज्या राजवंशीयात पार्टिया मानार्थ दुजः पदंलिसें व्यवस्थापिका संसदया दुजः पदं तकं निष्काशन यायेगु क्वःछ्यूगु खः । 
 
थौं पार्टिपाखें प्रेश विज्ञप्ति जारी यासें संसदय् टेबुल जूगु संविधान संशोधन प्रस्तावया सम्बन्धय् पार्टिपाखें ब्यूगु लिखित निर्देशनयात तकं अवज्ञा यासें पहिचान विरोधी ज्याखँय् जूगु धासें राजवंशीयात निष्काशन याःगु खः ।
 
पार्टिया मू छ्यान्जे विजय सैंजुया ल्हाःचिं दुगु विज्ञप्तिइ नेवाः प्रदेश व पहिचानवादि आन्दोलनया विरोधी गठबन्धनय् आवद्ध जूगुलिं राजवंशीयात निष्काशन यानागु धयातःगु दु । लिसें पहिचान विरोधी ज्याखँय् जुयाः पार्टिया सिद्धान्त, नीति व उद्देश्य अःखः ज्या याःगुलिं पार्टिपाखें निष्काशन यायेगु सर्वसम्मत निर्णय यानागु जानकारी नं विज्ञप्तिइ बियातःगु दु ।
 
पार्टिपाखें थौं हे पौ च्वयाः राजवंशीयात निष्काशन यानागु जानकारी व्यवस्थापिका संसद लिसें निर्वाचन आयोगय् छ्वयेधुंकूगु दु ।
Categorized in राजनीति