लगमय् न्हुदँया लसताय् जेष्ठ नागरिक सम्मान
नृपेन्द्रलाल श्रेष्ठ | कौलागा सप्तमी ११३९ (अक्टुवर २० २०१९)
येँ महानगरपालिका वडा २१ लगः खलःया ग्वसालय् नेपाल सम्बत ११४० या लसताय् जेष्ठ नागरिक सम्मान नाप वृहत सांस्कृतिक ज्याझ्वः जुगु दु ।
उगु ज्याझवलय् मूपाँहा येँ महानगरया मेयर बिद्यासुन्दर शाक्यं उलेज्या यानादिगु खः । मेयर शाक्यं येँ दुने गुलि न मूर्त अमूर्त सांस्कृतिक सम्पदा म्वाका तयेगु लागि थम्ह माःगु ग्वाहालि यायेत तयार दु धका धयादिसे स्थानीय वडाय् सांस्कृतिक सम्पदाया छु न सम्बन्धित मागया योजना अस्वीकृत जुगु मदु धका धयादिगु दु ।
मेयर शाक्यं जेष्ठ नागरिकपिन्त सम्मान कथं थाय् थासय् मनोरञ्जन केन्द्र स्थापना यायेगु योजना दु धका न धयादिगु दु । वयकलं जेष्ठ नागरिक परिवार व समाजया लागि बोझ मखु तिसा खः धइगु बिचा यायेमाःगुलि न बःबियादिगु दु ।
उगु ज्याझ्वलय् महानगर वडा २१ या अध्यक्ष उदयचुडामणि बज्राचार्य, नेपाल सम्बत् मुल समारोह समितिया अध्यक्ष रमेश महर्जन न थ थःगु खः तयादिगु खः ।
अथेहे ज्याझ्वलय् मूपाँहा येँ महानगरया मेयर शाक्यं ७० दँपिं ५४ म्ह मिज व ४० म्ह मिसापिन्त सम्मान न याःगु खः । नाप सांस्कृतिक ज्याझ्वः न जुगु खः ।
