लजगाःसहितया संस्कृति प्रबद्र्धन याय्माः धइगु जिगु उद्देश्य खः
लहनान्युज | कछलागा त्रयोदशी ११३८ (नोभेम्बर १६ २०१७)
राजेश शाक्य, नेकपा एमाले
प्रदेशसभा क या उम्मेदवार, क्षेत्र नं ८, येँ ।
थन येँया दुनेया बस्ति, नेवाः बस्ति, नेवाः लागाय् च्वंम्ह, भाषिक आन्दोलनय् जूम्ह, नेपाल सम्बतया आन्दोलनय् जूम्ह, नेवाः एकीकृत बस्तियात पहिचानलिसें सम्बद्र्धन व प्रबद्र्धन याय्गु ज्या न्ह्यचिलाच्वंम्ह माः धइगुकथं जिगु उम्मेदवारी बियागु खः ।
मेगु झीगु भाषा नेपालभाषा पुलांगु भाषा खः, तर थौंकन्हय् थ्व भाषा ल्हाइपिं म्हो जुजुं वनाच्वंगु दु । थुकिया संरक्षण सम्बद्र्धन याय्माःगु आःया आवश्यकता खः । नेपाः संविधानं सरकारी ज्याखँय् छगू प्रदेशय् स्वंगू भाषा जुइ धाःगु अवस्थाय् झीगु मांभाय् नेपालभाषायात नं सरकारी ज्याखँय् छ्यलेगु नितिं न्ह्यचिलेमाःगु दु ।
अथेहे नेपाल सम्बत् झीगु देय्या मौलिक नापं राष्ट्रिय सम्बत् खः । थुकियात राज्यं मान्यता बीधुंकल, तर व्यवहारय् छ्यलाच्वंगु मदु । व्यवहारय् छ्यलेगु झ्वलय् प्रदेश सरकारं थुकियात छ्यलाबुलाय् हय्गु नापं संरक्षण व प्रबद्र्धन याय्माः ।
नेपाःयात संयुक्त राष्ट्र संघय् दुजःया मान्यता बीकेगु नितिं छ्यःगु झीगु मौलिक लिपि रञ्जना लिपि झीसं ब्यवहारय् छ्यलेफयाच्वंगु मदु । थुकिया संरक्षणया नापनापं प्रबद्र्धन याय्माःगु दु । अथेहे स्वच्छ बिचाः, सुशासन, समृद्धि नेपाल, सुखी नेपाल दय्केगु अभियानयालिसें थुपिं समगै अभियानया नितिं येँ क्षेत्र नं ८या प्रदेशसभा ‘क’य् जिगु उम्मेदवारी खः ।
आःया अवस्थाय् प्रदेश सभा ‘क’य् जिगु मू प्रतिद्वन्दी पार्टीगतकथं काय्गु खःसा नेपाली कांग्रेस जुइफु । तर जिगु उम्मेदवारी बीधुंकाः जनताया दथुइ गुगु उत्साह वल, उमंग वल, अथेहे जि त्वाःत्वालय् वनाबलय् गुगु लकस दयावन, व स्वय्बलय् आःया अवस्थाय् सुं नं मदुथें च्वं ।
दकलय् न्हापां स्थानीय व प्रदेशकथं धाय्गु खःसा २०७२ सालय् ब्वःगु विनाशकारी भुखाचं विश्व सम्पदाय् लानाच्वंगु येँया दरबार क्षेत्रय् गुगु लिच्वः लाकल, यक्व सम्पदात स्यन, उकिया पुनःनिर्माण याय्गु ज्याय् प्राथमिकता बीगु जुइ, अथेहे मरुसतःया पुनःनिर्माणया ज्या तत्काल न्ह्याकेगु नितिं पहल याय्गु जुइ । च्वय् न्ह्यथनागु प्यंगू मुद्दाया नितिं ज्या याय्गु जुइ । अथेहे स्थानीय समस्यायात कयाः धाय्गु खःसा येँ वडा ल्याः २० व १३ वडा स्वाइगु लँय् यक्व हे जाम जुयाच्वंगु दुसा उगु जाम चीकेगु नितिं थप पुल दय्केगु जुइ ।
थ्वहे झ्वलय् येँ वडा ल्याः १९ व १५ स्वानाच्वंगु यातायाता ताँ (झोलुङ्गे पुल) लिक्क पक्कि ताँ मदया अनया जनतातय्सं यक्व हे समस्या फयाच्वंगु दु । अन नं छगू पक्कि ताँ दय्केगु नितिं ज्या याय्गु जुइ । झीगु संस्कृति झीगु पहिचान खः ।
तर संस्कृतिया अवस्था स्वय्गु खःसा झन्झन् न्हनावनाच्वंगु दु । थुगु अवस्थाय् संस्कृति जक दयां मगाः, लजगाः नं उलि हे आवश्यक जुइ । उकिं लजगाःसहितया संस्कृति प्रबद्र्धन याय्माः धइगु जिगु उद्देश्य खः, वकथं न्ह्याःवनेगु जुइ ।
Categorized in राजनीति
