लोकंह्वाःगु चाइनिज सिरियल हाकनं क्यनिगु
लहनान्युज | थिंलाथ्व द्धितिया ११४० (नोभेम्वर २८ २०१९)
चीनया अतिकं लोकंह्वागु टेलिसिरियल “शि यउ चि“ या नेपाली भर्सन “ पश्चिमतिरको यात्रा “ आः हाकनं नेपाल मण्डल टेलिभिजन व इन्डिजिनियस टेलिभिजनपाखें प्रसारण याइगु जूगु दु ।
येँ छगू पत्रकार सम्मेलन यासे अरनिको समाजया अध्यक्ष डा. सर्वोत्तम श्रेष्ठं चीन व नेपाःया सम्बन्ध अझ क्वातुकेगु नितिं थज्याःगु टेलिसियलपाखें ग्वाहालि याइगु खँय् बिश्वास यानादिगु खः ।
थुगु सिरियल प्यदँ न्ह्यः अरनिको समाजं चीनया केन्द्रिय टिभीया अनुमति कयाः थःपिनिगु हे स्रोतसाधन छ्यला नेपाली भाषं अनुवाद याना नेपालमण्डल टेलिभिजनय् निक्वः तक्क प्रसारण याःगु खः ।
आ थ्वहे वाःलंनिसें हाकनं स्वक्वःगु खुसिइ नं नेपाल मण्डल टेलिभिजनपाखें व इन्डिजिनियस टेलिभिजनपाखें न्हापांगु खुसिइ प्रसारण यायेत्यनागु खँया जानकारी डा श्रेष्ठं बियादिइगु खः ।
अथेहे नेपाल मण्डल टेलिभिजनया सीईओ कुमारराजा महर्जनं नं चीनया लोकंह्वागु प्यसदँ न्ह्यः पुलांगु चिनिया उपन्यासय् आधारित पश्चिमतिरको यात्रा नेपाल मण्डल टेलिभिजनपाखें स्वक्वगु
खुसिइ नं प्रसारण यायेगु ह्वता बिउगुलिं सुभाय् देछासे लसता प्वंकादिगु ।
इन्डिजिनियस टेलिभिजनपाखें जगत डोंग तामाङंं दकले न्हापांखुसिइ थःपिनिगु टेलिभिजनयात थुगु सिरियल प्रसारण यायेगु ह्वता बियादिइगुलिं लसता प्वंकादिल । अथेहे थुगु सिरियलया नेपाली भाषं स्वरांकन यायेगुलिइ डबिंग निर्देशक जुया ज्या यानादिइम्ह सिने पत्रकार विजयरत्न असंबरें थुगु सिरियलया स्वरांकन यानाबलेया अनुभव कनादीगु खः ।
ज्याझ्वलय् मूपाहाँ वाङमय शताब्दी पुरुष सत्यमोहन जोशीं चीनया साहित्य व संस्कृतिलिसें पश्चिमतिरको यात्राया बारे न्ववानादिइगु खः ।
थुगु सिरियल चीनिया प्रसिद्ध बौद्धभिक्षु स्वीयान् चाङ्( हुएन् साङ्) चीनपाखें भारतया नालन्दा विश्वविद्यालयया अध्ययन यायेत वंबलेया ऐतिहासिक यात्राया मुख्य विषयबस्तुइ आधारित खःसा थुगु सिरियल विशेष याना मस्तय्गु दथुइ अतिकं लोकंह्वाःगु व आःतक्क स्वद्व स्वयां अप्वः प्रसारित जुया विश्वया दकले अप्वः प्रसारित जूगु टिभि सिरियलया रुपय् विश्व रेकर्ड तयेत तक्कं ताःलागु खँ पत्रकार सम्मेलनय् जानकारी बिउगु खः । थ्व सिरियलया नेपाली भर्सनय् मूपात्र पिनिगु निंति सः बियादीम्ह कलाकार उमेश मायालु नं पत्रकार सम्मेलनय् उपस्थिति दुउगु खः ।
