श्याम प्रजापति, संघीय समाजवादी फोरम
प्रदेशसभा १ या उम्मेदवार, क्षेत्र नं. ७, येँ ।

न्हापां ला छगू पुलांगु पार्टीपाखें निरुत्साहीत जुयाः थुखे न्ह्यज्यानागु खः । देशय् अन्याय, अत्याचार, भ्रष्टाचार गुगु हालतय् न. मुक्त याय्माः धइगु आज्जु ज्वनाः थुकी उम्मेदवार बियागु जुल । मेगु झीगु पहिचानया नितिं, झीगु भाषा, संस्कृति, सम्पदायात ल्यंकातय्गु नितिं नं थ्व जिगु उम्मेदवारी खः ।

 पार्टीगतकथं धाय्गु खःसा गठबन्धन हे खः, तर ब्यक्तिगतकथं धाय्गु खःसा जिं खास हे प्रतिद्वन्दी मखना ।

 

 उम्मेदवार बीगु झ्वलय् झिंछगू बुँदाया प्रतिबद्धता न्ह्यब्वयागु दु । प्रदेशसभाय् वनाः थुकियात हे पूवंकेगु जुइ । खय्तला येँ महानगरपालिकाया प्रमुखं सच्छिन्हुया दिनस सच्छि व छगू प्रतिबद्धता पूवंकेगु धकाः न्ह्यब्वःगु जुल, तर उकियात पूवंके मफुत । याय्मफइगु बचं बियाः जक नं मजिल । उकिं जिं थःगु क्षेत्रय् यानाच्वनागु व याय्फइगु ज्यायात हे झिंछगू प्रतिबद्धता प्वंकागु जुल, गुगु त्याःसां बूसां नं पूवंकेफइकथंया खः । दक्कलय् न्हापां ला प्रदेशया नामांकन याय्गु खः । थन प्रदेश नं. ३य् आदिवासी नेवाः व तामाङ्गतय्गु बाहुल्यता दुगु हुनिं पहिचानया नितिं नं नेवाः ताम्सालिङ्ग  नामाकरण याय्गु खः । ११गू प्रदेशया अवधारणाकथं नेवाः प्रदेश अलग्ग जुइमाः धइगु झीगु अवधारणा खः ।

 

मेगु अन्याय्, अत्याचार, भ्रष्टाचार मुक्त प्रदेश दय्केगु । अथेहे जि नेपाः युथ अर्गनाइजेशनया नायः जूगु हुनिं नं थौंकन्हय् ‘फ्रेश ब्लड’या आवश्यकता यक्व हे अप्वया वनाच्वंगु दु । थ्व काय् मफयाः यक्व हे मनूतय्सं समस्या फय्मालाच्वंगु दु । थुकिया नितिं ज्या याय्गु जुइ ।

 

झीगु भाषा, संस्कृतिया ल्यंकेगु नितिं ज्या याय्गु गथेकि बाजं स्यनेगु, थःगु जातियात जक मखु, मेमेगु जातिया मस्तयुत स्यनाच्वनागु दुसा थुकिया नितिं पलाः न्ह्याकाच्वनेगु जुइ । मेखे नेपाःया हे मौलिक सम्बत्, नेपाःया नामं नीस्वनात    ःगु ‘नेपाल सम्बत्’यात राज्यय् छ्यलाबुला हय्गु, जातीय विभेदया समस्याय् लानाच्वंपिन्त थजाःगु विभेद चीकाः फुक्क छधी छप्पँ याय्गु नितिं ग्वसाः ग्वय्गु ज्या जुइ ।

 

अथेहे संविधानं क्वःछिना तय्धुंकूगु निःशुल्क शिक्षा व स्वास्थ्यया ब्यवस्था याय्गु । गुलि नं सरकारी ब्वनेकुथि व अस्पतालय् निःशुल्क जुयाच्वंसां नं गुणस्तरीय मजूगु हुनिं प्राइभेट ब्वनेकुथि व अस्पताल, क्लिनिकय् वनेमाःगु बाध्यता झीसं खनाच्वनागु दु । उकिया नितिं उचित व्यवस्था याय्गु जुइ । स्वय्बलय् थ्व चिचीधंग खँतथें च्वं, तर थुकिं झीगु जीवनयापनया नितिं तःधंगु भूमिका म्हिताच्वंगु दु ।

 

२०७२ सालय् विनाशकारी भुखाचं यक्व हे क्षति जूगु दुसा आःतक नं च्वनेगु नितिं उचित व्यवस्था सरकारं याय्फयाच्वंगु मदु । थुकिया नितिं एकीकृत बस्तीया अवधारणायात ग्वाहालि याय्गु जुइ । झीगु छगू तःधंगु समस्या धइगु आप्रवासी नं खः । थुकिया हुनिं लँ तब्याः याय्गु ज्यां थनया आदिवासी नेवाःत विस्थापित यानाच्वंगु दु ।

 

लःया समस्यालिसें सासः ल्हाय्त तकं थाकुयाच्वंगु अवस्था ब्वलंगु दु । थुकिया नितिं माःकथंया कानून, नीति दय्केगु नितिं सः तय्गु जुइ । देश विकासया नितिं लिचिले मखुगु प्रतिबद्धताकथं ज्या याय्गु जुइ, तर विकासया नामय् बिना मुआब्जा, क्षतिपूर्ति मबीगु व गैरन्यायिक सतक विस्तारयात कयाः विरोध याय्गु जुइ । विशेषयानाः थनया नेवाःत प्रभावित जयाच्वंग दुसा छगू तथ्यांककथं छगू लख न्यय्द्वः मनूत विस्थापित जुयाच्वंगु दु । सतक पीडित संघर्ष समितिनाप जानः नं सः तयाः वयाच्वनागु दु ।

 

अथेहे निश्चित मापदण्ड व थाय् क्वःछिनाः कृषि व औद्योगिक विकासया नितिं योजना दय्काः न्ह्याःवनेमाःगु दु । विकास स्वनिगलय् जक मखु, थुगु क्षेत्रया फुक्क थासय् अझ देशया कुंकुलामय् तकं जुइमाःगु दु, याय्माःगु दु ।