विक्रम शाक्यया लुमन्तिइ....
सुरजवीर बज्राचार्य
 
मतिनाया परिभाषा मथूम्ह छंत 
प्रेमया ब्याख्या गथे याय् जिं 
 
मनं मनं दः यय्कूसां नं 
मखुथें च्वंकः स्वय्मते छं 
जिन्दगीया सहारा हे मतिना खःसा 
मथू पहलं च्वनागु हे छाय् । 
 
किचः हे खनेवं यय्के लात जि
ल्यूने च्वनाः जक स्वइच्वन छं 
निगू आत्माया प्रेम थ्व खःसा 
मथू पहलं च्वनागु हे छाय् 
 
विक्रम शाक्यनापया जिगु म्हसीका थुगु हे शब्दं याकाब्यूगु खः । २५दँ पुलां मयाय्धुंकल । बी.कम. ब्वनाच्वनाबलय् क्याम्पस क्याम्पसया पाला, खलः, पुचः दथुइ जुइगु थीथीकथंया धेंधेंबल्ला कासाय् नेपाल कमर्श क्याम्पस नं स्वनिगः साहित्य पालाया ब्वति, सिरपाः व ज्याखँ लुयावःगु ई । अस्कल क्याम्पसय् निभाः साहित्य पालाया ग्वसालय् जूगु निभाः म्ये धेंधेंबल्ला कासाय् ब्वति काय्त वरिष्ठ संगीतकःमि अमरराज शर्मा नापलाः वना । थुगु धेंधेंबल्लापाखें म्ये हालेज्याय् औपचारिक पलाः न्ह्याकाच्वनाम्ह जिगु नितिं अमरराज शर्मां दाजुं बियादीगु म्ये खः थुगु म्ये । अले वय्कलं च्वमिया बारे जानकारी बियादिसें कयादीगु नां नं विक्रम शाक्य । 
 
क्याम्पसया जीवननापं नेपालभाषा ख्यलय् सक्रिय जुइखंगु पुचः लिपि थपू गुथिइ नापं ज्या यानाबलय् लुल विक्रम शाक्य । यलय् लिपिया संरक्षण, प्रचारया नितिं स्थापना जूगु लिपि थपू गुथि पुनःगठन लिपा छगू हे कार्यसमितिइ च्वनाः ज्या यानाबलय् थुगु म्येया चर्चा जूबलय् म्येहालामि व म्येच्वमि निम्हं अजू चाल । थ्व स्वयां न्ह्यः निम्हसिके नं दुगु बस् छगू नां जक । नां जक नुगलय् लुइकाः म्येया सर्जक म्हसीकेगु ज्या जूगु लिपि थपू गुथि उबलय् विक्रम शाक्यया छेँ दुगु बहाः नःबहालय् । व ल्याखं नां, म्हसीका लिपा ज्या नं ज्वःलाःगु जक मखु, छेँय् वय्वने व छेँजःपिनिगु नं थः हे परिवारकथं याइगु ब्यवहारं जिमि दथुया म्हसीका असीमित जुयावन ।
 
लिपि थपू गुथिया छाप, प्रभाव जिपिं निम्हेसिगु हे जीवनय् अतिकं महत्व दु । व ई नेपाःया प्राचीन लिपि ख्यलय् पुनःजागरण लूगु ई खः, यलया सन्दर्भय् । थुकथं सक्रियगु गुथिया कार्यसमितिया सक्रिय पदाधिकारीपिं जुयाः थीथी ज्याझ्वः ग्वसाः, लिपि स्यनेज्या, लिपि ब्वज्या जक मखु, प्रचलित नेपाल लिपि व रञ्जना लिपिया कम्प्यूटर फन्ट विकास यासें ‘थपू’ लय्पौ पिथनागु ज्या थौं झलझल लुमं । नेपालभाषा पत्रकारिता ख्यःया विकास व विस्तारय् योगदान यानादीम्ह विक्रम शाक्यनाप थुगु पत्रिका पिथनेगु नितिं यानागु ज्याय् गुथिं जितः सम्पादक व विक्रम शाक्ययात सह–सम्पादकया भाला ब्यूगु खः । थुगु लय्पौ पिथनाज्याय् भालाकथं निम्हसिनं सक्रिय जुयाः ज्या याना, तर विक्रम शाक्य सदां न्ह्यलुवाःकथं नुगलय् लुयाच्वनी । नुगलं हनाच्वनी । न्ह्याग्गुं विषयस् न्ह्याबलें माःसा तुरुन्त लेख च्वय्फूम्ह वय्कः पत्रकारिता ख्यलय् वरिष्ठम्ह जुयाः जक मखु, दक्वं धइथें ज्याय् समर्पण, मेहेनत, सक्रिय, स्यनेज्याय् नं नुगःस्वां ह्वःम्ह जुयाः खः । सोझाम्ह विक्रम शाक्यं मनुखं नुगलय् स्याक्क याःगु ब्यवहारयात नुगलय् घाना मतःसा सायद हे सुयातं नुगलय् स्याक्कं छुं धाःगु दइ । 
 
 
गुथिया आपालं ज्याझ्वः जक मखुसे आपालं मेमेगु खलःपुचःया थीथीकथंया ज्याझ्वः न्ह्याकेगु भाला नं बांलाक्क पूवंकादिल वय्कलं । छम्ह बांलाःम्ह दबूया ज्याझ्वः न्ह्याकामि विक्रमया सःजक थ्वय्वं हे ज्याझ्वः झःझः धाः । थुगु ज्याय् नं जिगु पलाःया न्ह्यलुवाकथं कयाम्ह विक्रमनाप १०० मेगाहर्जय् नेपालभाषाया ज्याझ्वः ‘भिंतुना सच्छि’ न्ह्याकागुया अनुभव गथे ल्वःमंकेफइ । नेपालभाषाया ज्याझ्वःया न्ह्याकेगु नितिं किरण शाक्य, सुरज ब्यञ्जकार, सुरेश प्रधाननाप जानाः संचालक समिति दय्कूसें कलश मिडिया प्रा.लि. स्वनेज्या जुल । उबलय् पासा सुरज ब्यञ्जनकारनाप न्ह्याकागु ‘ख्याः बच्छि निं बच्छि’ लोकंह्वाःगु ज्याझ्वःकथं जिमित रेडियोय् पलाः न्ह्याकेगु लकस चूलातसा मेगु छगू ज्याझ्वः अतिकं लोकंह्वात, गुगु ज्याझ्वः विक्रम शाक्यया ब्राण्डकथं निरन्तर जुल । व ज्याझ्वः खः ‘धम्प तछ्या’ । छम्ह न्यँमियात छगू सेट न्ह्यसः, ग्वःम्हसित ब्वति काल वःगु हे सेट न्ह्यसः दय्काः, संगीत व इफेक्टया छ्यलाबुलां न्ह्याइपुगु ज्याझ्वः निर्माणया नितिं यानादीगु मेहेनत नं थुगु इलय् मिखाय् झलझल लुयाच्वं । 
 
पद्मावती बचत तथा ऋण सहकारी संस्था, नःबहालं ग्वसाः ग्वइगु प्रत्येक ज्याझ्वलय् म्ये हालेगु नितिं सदां ब्वनादी, नुगःखँ तय्गु व ज्याझ्वः न्ह्याकेगु गुण विकासया नितिं छम्ह बांलाःम्ह प्रशिक्षक विक्रमया उगु ग्वसालय् नं न्ह्याबलें हे छन्हुया क्लासया भाला नं चूलाइ । वय्कलं गुबलें नं थजाःगु भाला बियादी, न्ह्यात्थेंजाःगु ज्या दुसां म्हां मलात धाय्गु आँट गुबलें हे मवः । विक्रम शाक्ययागु ब्यक्तित्व हे अजाःगु । छेँया छम्ह दुजःकथं प्रत्येक छेँज्याय् नं उत्तिकं ग्वाहालि याय् न्ह्यांम्ह विक्रम जि छेँजःपिनि नं सकसिया यःम्ह, थःम्ह खः ।  
 
२०५६ साल जेठ १८ गते । थुबलय् येँ महानगरपालिकां नेवाः भाय्यात ब्यूगु मान्यतायात सर्वोच्चं पन । आन्दोलनया सः ब्वलन । यलय् नेतृत्व सुम्क च्वन । जिम्मेवारपिं सुम्क च्वंबलय् न्हूगु
नेतृत्व ब्वलन । ल्याय्म्हतय्गु नेतृत्व । उकी न्ह्यलुवाकथं लूपिं दथुइ छम्ह विक्रम शाक्य नं खः । बन्दपाखें असन्तुष्टि प्वंकेगु ज्याझ्वःया उद्घोष जुइखतं उकिया प्रचारया नितिं अनेककथंया शैली न्ह्यःने वल । प्रचार थुलि प्रभावकारी जुल कि बन्द व संघर्ष नं सदां लुमनीकथंया जुल । लिपा प्रशासन धरपकड शुरु यात । छुं दिं भूमिगत नं जुइमाल । धरपकड याःपिन्त मत्वःतेवं नेतृत्व याःगु ल्याय्म्ह पुचः सुलामच्वं ।पिहां वल । ज्वनातःपिं पासापिन्त त्वःतकेगु नितिं पहल न्ह्यात ।
 
न्ह्याकीपिं सुं न्ह्यःने मदुबलय्या आवश्यकता पूवंकूपिं दथुइ छम्ह मू ब्यक्ति विक्रम शाक्य सदां नेपालभाषा आन्दोलनय् न्ह्यःने हे लानाच्वन । भौतिकरुपं, कर्मं अले विचारं नं । उलि जक मखु नेवाः पत्रकारत छवाः छधी जुयाः न्ह्याःवनेमाःगु आवश्यकता वाःचाय्कूसें नेवाः पत्रकार राष्ट्रिय दबू स्वनेगु ज्याय् च्यूताःनिसें यलया कचायात धिसि धाय्केगु ज्याय् तकं योगदान यानादीम्ह वय्कलं म्हमफयाः थःगु मनयात साथ बीमफूगु शरीरया च्यूताः मतःसे स्वक्वःगु महाधिवेशनय् ब्वति काःगु उगु उत्साह नं सदां लुमनी । 
 
 
म्हिगः विक्रम शाक्य दुबलय् छगू हे लक्ष्यं थ्यंकेकथं छका हे लँय् नापं नं न्ह्याना । इलं व कर्मं तापाकाः ब्यूबलय् थःथःगु लँय् बिस्कं बिस्कं पलाः नं न्ह्यात । थौं विक्रम मदयावन । विक्रमया पलाख्वाँय् लुमंकाबलय् थःगु जीवनया न्ह्यलुवा नं विक्रम शाक्य हे खः धइगु निश्चित जुयाच्वंगु वाःचायाच्वन । विक्रम शाक्यया पलाख्वाँय् सदां ल्यनाच्वनी । अले उगु पलाः ख्वाँय् नालीपिं अल्याख विक्रम थन लुयाच्वनी । विक्रम सदां निभाःथें त्वयाच्वनी । अमर विक्रम शाक्ययात मायां अले श्रद्धां जाःगु निफुति ख्वबिलिसें आखःया थुगु छपुचः देछाना सदां नुगलय् कियातय्गु बचंलिसें ।