विपक्षी गठबन्धनं सर्वोच्च अदालतय् रिट दर्ता यात
लहानान्युज | कछलाथ्व त्रयोदशी ११४१,जेष्ठ १० सोमवाः
प्रतिनिधिसभा पुनःस्थापना व शेरबहादुर देउवायात प्रधानमन्त्री नियुक्त यायेमाःगु मागलिसें विपक्षी गठबन्धनं सर्वोच्च अदालतय् थौं रिट दर्ता याःगु दु ।
विपक्षी दलया नेता तकं जुयादिम्ह नेपाली कांग्रेसया सभापति शेरवहादुर देउवाया नेतृत्वय् विपक्षी गठबन्धनया शीर्ष नेतालिसें बहुमत सांसदपिं सर्वोच्च अदालत झाया रिट दर्ता याःगु खः । विपक्षी गठबन्धनं रिटय् मू कथं संसद विघटन यायेत सिफारिस याःगु मन्त्रिपरिषद्या निर्णय खारेज, संसद अधिवेशनया मिति क्वछिमाःगु, ंविधानया धारा ७६ या ५ कथं शेरबहादुर देउवायात प्रधानमन्त्रीइ नियुक्त यायेमाःग्ु लगायतया विषयलय् परमादेश माग याःगु दु ।
रीटय् विघटित प्रतिनिधिसभाया १४६म्ह सांसदपिनिगु ल्हाचिं दूगु खः । संविधानया धारा ७६ या ५ बमोजिम नियुक्त जुइगु प्रधानमन्त्रीया लागि समर्थन याःगु लिधंसाय् प्रतिनिधिसभाया दुजःपिन्त दल त्याग अन्तर्गत कारबाही दिकेमाःगु माग नं याःगु दु ।
राष्ट्रपति व प्रधानमन्त्री जाना वैकल्पिक सरकार निस्वनेगु प्रक्रियायात पंगः थना प्रतिनिधिसभा विघटन याःगु गठबन्धनपिनिगु द्वपं दु । संविधानया उगु धाराय् सरकार निस्वनेया नितिं आह्वान जुया प्रक्रियासम्मत कथं दाबी जुइधुंका उकियात राष्ट्रपतिं इन्कार याये मज्यूगु विपक्षी गठबन्धनपिनिगु व्याख्या दु ।
विपक्षी गठबन्धनं आइतबाः हे अदालत वनेगु धाःसा कानुनी ढाँचाकथं कागजातलिसेंया विवरण व मस्यौदा तयार मजूगुलिं थौं रिट पेश याःगु खः ।
