२०८० चैत्र १६, शुक्रबार

विमान दुर्घटनायात कयाः प्रधानमन्त्री व बंगलादेशया पर्यटन मन्त्री दथुइ खँल्हाबँल्हा

ने.सं. ११३८ चिल्लागा १२ (१४ मार्च २०१८), बुधवाः

विमान दुर्घटनायात कयाः जानकारी कायेत झायादीम्ह बंगलादेशया नागरिक उड्डयन नापं पर्यटन मन्त्री एकेएम शाहाजाहाँ कमालं थौं बुधवाः प्रधानमन्त्री केपी शर्मा ओलीलिसे नापलानादीगु दु ।
 
 
थ्व हे झ्वलय् प्रधानमन्त्री ओलीं विमान दुर्घटनापाखें सीपिनिगु शोकय् लानादीपिं बंगलादेशया प्रधानमन्त्री, सरकार व जनतायात समवेदनालिसें सहानुभूति प्वंकादीगु दु ।
 
 
वय्कलं घटनाया छानवीनया नितिं सरकारं जाँचबुझ आयोग दयेकेधुंकूगु जानकारी बियादिसें आयोगया प्रतिवेदन वयेधुंकाः सत्यतथ्य पिहांवइगु धयादिल ।
 
 
बंगलादेशया मन्त्री कमालं नेपाल सरकारं विमान दुर्घटनालिपा घाःपाः जूपिनिगु उद्दार व वासः यायेगु ज्याय् क्यनादीगु सक्रियतायात कयाः च्वछायादिल ।
 
 
नेपाःया थुगु सदाशयताया नितिं बंगलादेशया प्रधानमन्त्री शेख हसिना वाजेदं प्रधानमन्त्री ओलीयात कृतज्ञतालिसें सुभाय् बियादीगु कमालं जानकारी याकादिल ।
 
 
वंगु सोमवाः बंगलादेशया राजधानी ढाकापाखें येँय् वःगु युएस बंगला एअरलाइन्सया विमान त्रिभूवन अन्तर्राष्ट्रिय विमानस्थलय् दुर्घटना जूगु इलय् ४९म्ह सीगु खः ।
 
 
घटनायात कयाः जानकारी कायेत बंगलादेशया नागरिक उड्डयन मन्त्री कमाल येँय् झायादीगु खः ।
Categorized in राष्ट्रिय