विश्व वरियता नेपाः प्यंगू थाय् कुहां वल
लहनान्युज | ने.सं. ११३९ तछलाथ्व द्वादशि (१४ जुन, २०१९), शुक्रवाः
विश्व बरियताय् नेपाःया फुटबल प्यंगू थाय् कुहां वयाः १६५गू थासय् लाःगु दु ।
विश्व फुटबल महासंघ (फिफा)पाखें थौं शुक्रवाः सार्वजनिक याःगु विश्व वरियाताय् नेपाः प्यंगू थाय् कुहांवःगु खः । थ्व स्वयां न्ह्यः नेपाः १६१गू थासय् लानाच्वंगु खः ।
नेपालं थ्व हे जुन महिनाय् मलेसियालिसे २गू गोल बूगु खःसा मेगु मैत्रीपूर्ण कासाय् चाइनिज ताइपेइलिसे १–१गू गोलया ज्वलिंज्वः म्हितूगु खः ।
थुखे भारत धाःसा १०१गू थासय् यथावत जूगु इलय् माल्दिभ्स् १५१गू थासय् दु । अथे हे बङ्गलादेश ५गू थाय् च्वय् वनाः १८३गू थासय् लाःगु दुसा भुटान १८६गू थासय् लाःगु दु ।
अथे हे श्रीलंका २०१गू व पाकिस्तान २०५गू थासय् लानाच्वंगु दु ।
विश्व बरियताया शीर्ष स्थानय् बेल्जियम हे लानाच्वंगु दु । निगूगु थासय् विश्वविजेता फ्रान्स दुसा स्वंगूगु थासय् ब्राजिल, प्यंगूगु थासय् इङ्गल्याण्ड व न्यागूगु थासय् पोर्चुगल लानाच्वंगु दु ।
Categorized in कासा
