वुहानय् च्वंगु प्रयोगशालाया सुनं कर्मचारी कोरोना भाइरसं संक्रमित मजुगु चीनया दावी
कछलागा दशमी ११४१, जेठ २२ शनिबाः ( लहनान्यूज
चीनं हुबेइ प्रान्तया वुहानय् च्वंगु प्रयोगशालाया सुनं कर्मचारी वा अनुसन्धानकर्ता कोरोना भाइरसं संक्रमित मदुगु दावी याःगु दु ।
अमेरिकी गुप्तचर निकायया प्रतिवेदनय् सन् २०१९ या अन्त्यपाखे चीनय् कोरोना भाइरसया संक्रमण पुष्टि जुइन्ह्यः वुहानया प्रयोगशालाय स्वम्हेसित कोरोना थें जाःगु लक्षण खनेदूगु उल्लेख यासेंलि चीनं उकिया खण्डन याना थुजागु दावी याःगु खः । अमेरिकी गुप्तचर निकायया प्रतिवेदनलिपा अमेरिकी राष्ट्रपति जो बाइडेनं वंगु वाःलय् दुवायेक अध्ययन याना ९०न्हूया दुने प्रतिवेदन न्ह्यब्वयेत उजं बिउगु खः ।
विश्व स्वास्थ्य संगठन (डब्लुएचओ) या संयोजनय् अन्तर्राष्ट्रिय अनुसन्धानकर्तां याःगु उगु अध्ययनं कोरोना भाइरस प्रयोगशालापाखें पिहाँवया मनुपिन्त लाःगु जुइफइगु सम्भावना दुर्लभ जूगु तर मेगु अध्ययन धाःस जुइमाःगु धाःगु खः ।
यद्यपि चीनया विदेश मन्त्रालयया प्रवक्ता वाङ्ग वेनबिनं वुहान इन्स्टिच्यूड अफ भाइरोलोजीइ सन् २०१९ या डिसेम्बर ३० न्ह्यः कोरोना भाइरसया छुनं जानकारी मदूगु दावी यानादिगु दु ।
थ्वहे तथ्यांकया लिधंसाय् अमेरिकाया वरिष्ठ संक्रामक रोग विशेषज्ञ डा.एन्थोनी फाउचीं चीनलिसे वुहानया प्रयोगशालाया स्वम्ह अनुसन्धानकर्तालिसें मुक्कं ९म्ह चिनियाँ नागरिकया स्वास्थ्य सम्बन्धी विवरण न्ह्यब्वयेत माग यानादिगु दु ।
