शहीद धर्मभक्तया नामय् पार्क उलेज्या
लहनान्युज | सिल्लाथ्व पञ्चमी ११४० (जनवरी ३० २०२०)
येँ महानगरपालिका वडा नं. २३ स्थित यंगाः त्वालय् शहीद धर्मभक्त माथेमाया लुमंतिइ दयेकूगु पार्क कामपा प्रमुख विद्यासुन्दर शाक्यपाखें उलेज्या जुल । माघ १६ गते शहीद दिवस कुन्हु छगू ज्याझ्वःया दथुइ मेयर शाक्यं शहीद धर्मभक्त पार्क लिसें अन दुने धस्वाकातःगु शहीद धर्मभक्त माथेमाया झ्वाता नं उलेज्या यानादीगु खः ।
ज्याझ्वलय् न्ववासें मेयर शाक्यं शहीदपिनि सम्मानय् येँ महानगरपालिकापाखें राणा सरकारं मृत्युदण्ड ब्यूपिं प्यम्हं शहीदपिनि पूर्ण कदया झ्वाता धस्वाकेगु ज्या जूगु खँ कनादिल ।
शहीदपिंसं समृद्ध नेपाः व सुखी नेपालीया म्हगस खंकाः हे ज्यान बलिदान याःगु खँ कँसें मेयर शाक्यं धयादिल, ‘वर्तमान सरकार समृद्ध नेपाःया लक्ष्य ज्वनाः न्ह्याः वनाच्वंगु दु, शहीदपिनि म्हगस नं थ्वहे खः ।’
धर्मभक्तया काय्चा लिसें शिक्षाविद् डा. केदारभक्त माथेमां ओमबहाः त्वाः धइगु २००७ साल क्रान्तिया ‘इपिसेन्टर’ खः धासें धर्मभक्तं थ्वहे त्वाःयात केन्द्र दयेकाः अबले राजनीतिक गतिविधि याःगु खँ कनादिल । उगु थासय् धर्मभक्तया झ्वाता नापनापं पार्क दयेकाः खुल्ला क्षेत्रया सदुपयोग याःगु खँय् वय्कलं लसता नं प्वंकादिल ।
येँ मनपा वडा २३ या अध्यक्ष मचाराजा महर्जनं थन धर्मभक्तया झ्वाता व पार्क जक मखुसें पार्कया क्वय् ३० हजार लिटर लः न्ह्यंगु छगू ट्यांकी नं दयेकागु खँ कँसें वडाय् दमकल दुहां वने मफइगु छुं नं थासय् छेँ मिं नल धाःसा वहे लः छ्यलाः मेशिनपाखें मि स्याये फइगु जानकारी बियादिल ।
पुलांम्ह मन्त्री प्रयागराज सिं सुवालं शुक्रराज जोशीयात यखानाः स्याःबलय् सिमाय् यगानाच्वंगु लाश थःपिं नं स्वः वनागु खँ कनादिल । पुलांम्ह वडा अध्यक्ष पवित्र वज्राचार्यं शहीद दिवस न्यायेगु खःसा शहीदया म्हगस पूवंकेगुपाखे नं झीगु ध्यान वनेमाःगु बिचाः तयादिल । मचा साहित्यकार शान्तदास मानन्धर नेपाली राजनीतिया आजुअजा धइपिं हे थ्व प्यम्ह शहीद जूगुलिं वय्कःपिंत झीसं सदां लुमंकेमाः धयादिल ।
शहीद धर्मभक्त माथेमा २३ वडास्थित ओमबहाः त्वालय् हे जन्म जूम्ह खः । वय्कलं ओमबहाःया हे जोरगणेशस्थित थः निनिया छेँय् छगू गोप्य भेला यासें नेपाःया न्हापांगु राजनीतिक संगठन नेपाल प्रजापरिषद् गठन यानादीगु खः ।
