शाक्य महाविहारं गुथि विधेयकयात कया च्यूता
येँ देय्या शाक्यत च्वनिगु महाविहारया संगठन शाक्य महाविहार संघया न्याक्वःगु बुदिं छगु ज्याझ्वः याना हंगु दु । 
 
 
थुकथं बुदिं हनेगु झ्वलय् महासंघं सरकारं पितहःगु गुथि विधेयक आःयात लित काःगु जूसां खारेज मयानिगु खँयात कया च्यूता प्वकुंगु दु । महासंघया बुदिंया ज्याझ्वलय् महासंघया नायः शुभकाजी शाक्यं थ्व खँ न्ह्यथनादीगु खः । 
 
 
महासंघया नायः शाक्यया सभाध्यक्षताय् न्ह्याःगु ज्याझ्वलय् प्रदेश नं ३ या सांसद राजेश शाक्य मूपाहाँ कथं झायादीगु खःसा वयकलं नेपालमण्डलया तःजिगु संस्कृति धइगु हे बौद्ध संस्कृति व बौद्ध परम्परा खः धका धयादिलसा थज्यागु ज्वमदुगु परम्परायात बौद्ध महाविहार संध जाना ल्यंका तःगु खः धका नं न्ह्यःथनादिल । 
 
 
शाक्य महाविहार संघया बुन्हिया ज्याझ्वलय् पुलांम्ह मन्त्री एवं बौद्ध विद्वान डा. केशव मान शाक्यं बुद्धवंशयात कया दुवाला दिल । नघः बहाःया रत्नमान शाक्यया उपस्थितिइ जूगु उगु ज्याझ्वलय् महासंघया न्वकु अमिरमान शाक्यं लसकुस यानादीगु खःसा ज्याझ्वः महासंघया छ्याञ्जे संघरत्न शाक्यं न्ह्याकादीगु खः ।