शान्ति सैनिक अप्वः छ्वइगु धलखय् नेपाः स्वंगूगु थासय्
बछलागा पञ्चमी ११४१, असार १५ मंगलबाः
संयुक्त राष्ट्रसंघया आह्वानय् हलिमय् शान्ति निस्वनेगु ज्याय् यक्वः सैनिक छ्वइगु मुलुकया धलखय् नेपाः स्वंगूगु थासय् थहाँ वंगु दु ।
शान्ति सैनिक छ्वया योगदान बिइगु हलिंया मुलुकया धलःया स्वंगुगु थासय् लाःगु सैनिक प्रवक्ता सन्तोषबल्लभ पौडेलं जानकारी बियादिल । हलिंयंकया द्वन्द्व जुयाच्वंगु देशय् १२गू शान्ति मिसनय् न्याद्वः व १५४ या ल्याखय् आः नेपाली शान्ति सेना दुथ्यानाच्वंगु दु ।
हलिंया १२२ देशं राष्ट्रसंघया आह्वानय् शान्ति सैनिक परिचालन यानाच्वंगु दु । अफ्रिका महादेशया द्वन्द्व जुयाच्वंगु देय् सुडान व कंगोलिसेंया देशय् आः शान्ति सेनाया ज्या यानाच्वंपिं नेपाली मिसा सैनिकया ल्या १७६म्ह दु । थ्वयांन्ह्यः १५५०म्ह नेपाली मिसा सैनिकपाखें शान्तिया निति ज्या जुयाच्वंगु खः ।
सन् १९५८ य् लेबनानपाखें विश्वशान्ति स्थापनाया ज्याय् सैनिक छ्वय्गु न्ह्याःगु खः । विश्वशान्ति स्थापना ज्याय् सैनिक छ्वया बः बिउ कथं ६३दँया ईलय् नेपाली सेनां छगू लख, ३५द्वः व ३४३ थान शान्ति (युएन) पदक तकं कायेता ताः लायेधुंकूगु दु ।
अनुशासित, व्यावसायिक व साहसिक सैनिकया कथं स्थापित नेपाली सेनां शान्ति मिसन यात्राय् द्वन्द्वपीडितपिनिगु नुगः त्याका शान्ति निस्वनेत सिपालु “पिस च्याम्पियन”या छवि तकं दयेकेधुंकूगु दु । नेपाली सेनायाके हलिमय् ४२गू शान्ति मिसनय् ज्या याःगु अनुभव दु ।
