संघीय संसद प्रतिपक्षीपाखें अवरुद्ध
लहनान्यूज | ने.सं. ११३९ दिल्लाथ्व अष्टमि/नवमि (९ जुलाइ, २०१९), बुधवाः
नेत्रविक्रम चन्द समूहया सर्लाही इन्चार्ज कुमार पौडेल सीगु खँय् छानवीन यायेत संसदीय समिति नीस्वनेगु विषयस सत्तापक्ष व प्रतिपक्षी दल दथुइ खँ मिलय् मजुइवं प्रतिनिधिसभाया मुँज्या प्रभावित जूगु दु । पौडेल सीगु प्रहरीलिसे ल्वापु जुयाः मखुसे तप्यंक हे गोलिं कयेकूगुलिं जूगु दावी यासें प्रतिपक्षी दल नेपाली कांग्रेस व राष्ट्रिय जनता पार्टी, राजपा नेपालं संसदीय छानवीनया माग याना वयाच्वंगु खः ।
प्रतिपक्षीया अवरोधया हुनिं म्हिगः मंगलवाःया मुँज्या नं अवरुद्ध जूगु खः । न्हिनय् छताः ईया नितिं सःतातःगु थौंया मुँज्या थ्यंमथ्यं छघौत्या लिबाक्क न्ह्याःसा नं प्रतिपक्षी कांग्रेस व राजपा नेपालया नेतातसें बेल घेराउ यासें नारावाजी याःगु खः ।
नाराबाजीया दथुइ सभामुख कृष्णबहादुर महरां प्रतिनिधिसभाया सचिव गोपालनाथ योगीयात राष्ट्रियसभापाखें वःगु सन्देश न्यंकेत ई बियादीगु खः । सचिव योगीं नाराबाजीया दथुइ सन्देश न्यंकेवं सभामुख महरां वइगु सोमवाःतकया नितिं मुँज्या स्थगित यानादिल ।
संसदया कार्यव्यवस्था समितिया मुँज्याय् प्रतिपक्षी दलं संसदं हे छानवीन समिति दयेकेमाःगु अडानयात लिसा काःगु दु । प्रतिपक्षया मागयात कयाः असमति क्यंसें सत्तापक्षया सांसदं छानवीनया जिम्मा संसदीय समितियात बीमाःगु धया वयाच्वंगु खः । दल दथुइ सहमति जुइ मफयेवं प्रतिनिधिसभाया मुँज्या थौं निन्हुया दिनस नं प्रभावित जूगु खः ।
संसदया राज्य ब्यवस्था समिति घटनायात कयाः छानवीन यासें प्रहरीलिसेया ल्वापुइ हे पौडेल सीगु निष्कर्ष पिथंगु खः । गृहमन्त्री रामबहादुर थापां प्रतिनिधिसभाया म्हिगःया मुँज्यायात सम्बोधन यानादिसें ल्वापुइ हे पौडेल सीगु धयादीवं वय्कलं संसदय् मखुगु खँ ल्हाःगु धासें प्रतिपक्षी दलं रोष्ट्रम घेराउ याःसें विरोध याःगु खः । कार्यव्यवस्था परामर्श समितिया मुँज्याय् सभामुख कृष्णबहादुर महरां प्रतिपक्षी दलया मागयात कयाः सहलह यासें सहमतिया कुतः याःसां नं संसदया मुँज्या अवरुद्ध मयायेत इनाप याःगु खः ।
थ्व हे दथुइ, संघीय संसदं वइगु आर्थिक वर्षया पूर्ण बजेट पारित याःगु दु । प्रतिनिधिसभाय् सचिव योगीं बजेट आश्रित प्यंगू विधेयक राष्ट्रियसभापाखें पारित जूगु सूचं न्ह्यब्वसें आर्थिक वर्ष शुरु जुइगु छवाः ल्यं दनिबलय् पूर्ण बजेट पारित जूगु खः । प्रतिनिधिसभां पारित याना छ्वःगु विनियोजन, आर्थिक, राष्ट्र ऋण म्हयेगु व ऋण नापं जमानत २३क्वःगु संशोधन विधेयक राष्ट्रियसभां विना संशोधन पारित जूगु खः ।
Categorized in राष्ट्रिय
