सडक विस्तारया विरोधय् अनसन न्ह्यानाच्वन
लहनान्यूज | चौलाथ्व दशमी ११३७ (अप्रिल ६ २०१७)
स्वनिगःया थीथी थासय् जुयाच्वंगु सडक विस्तारया विरोधय् जुयाच्वंगु अनसन थौं नं न्ह्याना हे च्वंगु दनि ।
उपत्यकाव्यापी सडक विस्तार संघर्ष समितिया आव्हानय् म्हिगःनिसें न्ह्याःगु रिले अनसनया थौं निन्हुगु दिनय् झिम्ह अनसन च्वनाच्वंगु दु ।
संघर्ष समितिया नायः सुमन सायमिं लहनान्यूजलिसे खँ ल्हासें राज्यं गैरन्यायिक रुपं यानाच्वंगु सडक विस्तारया ज्या मदिकूतल्ले थःपिं संघर्ष याना हे च्वनेगु धयादिल । नायः सायमिं अझ नं सरकारं थःपिनिगु मागया सुनुवाइ मयाःसा लिपा आमरण अनसन हे च्वनेगु धयादिल ।
म्हिगःनिसें अनसनया ज्याझ्वः न्ह्यायेधुंकाः च्यूताः व ऐक्यवद्धता क्यँसें थीथी संघसंस्थाया प्रतिनिधिपिं थःपिन्त नापलाःवःगु सायमिं जानकारी बियादिल । तर आःतक्क गुगु नं दलया नेतापिं धाःसा मवःनिगु वयकलं धयादिल ।
राज्यया गैरन्यायिक ज्याखँप्रति जनताया दथुइ विद्रोह दना वयाच्वंगु अवस्थाय् राज्यं इलय् हे बिचाः यायेमाःगु सायमिं धयादिल । थःपिनिगु मागया इलय् हे सुनुवाइ मयाःसा अझ सशक्त आन्दोलन न्ह्याकेगु वयकःया धापू खः ।
Categorized in राष्ट्रिय
