नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठया १०५ क्वःगु बुदिं हःगु दु । उगु ज्याझ्वलय् सञ्चार तथा सूचना प्रविधि मन्त्री पार्वत गुरुङं श्रेष्ठया झ्वाताय् माल्यार्पण यानादीगु दु।

सञ्चार मन्त्री गुरुङ नाप नेवाः पत्रकार राष्ट्रिय दबुया पदाधिकारी पिन्स झ्वाताय् माल्यार्पण स्वां देछानादीगु खः ।

उगु ज्याझ्वलय् दबूया अध्यक्ष सुरजवीर वज्राचार्य न श्रेष्ठयात नेपाल पत्रकार महासंघया संस्थापक अध्यक्ष याःगु पहिचान बिइमाः धइगु ध्यानाकर्षण पत्र सञ्चारमन्त्री गुरुङयात लल्हानादीगु खः।

ज्याझ्वलय् सञ्चार मन्त्री गुरुङं पत्रकार महासंघया अध्यक्ष विवाद बारेय् थःगु  ध्यानाकर्षण जुगु धका धयादीसे थुकिया लागि सरोकारवाला नाप सहलहयाना विवाद टुङ्गय् यायेगु जुइ धका धयादीगु खः। उगु ज्याझ्वलय् नेपाल पत्रकार महासंघया उपाध्यक्ष दिलिप थापा मगरं दस्तावेज, प्रमाण दुगु अवस्थाय् महासंघ न श्रेष्ठया योगदानयाःगु कदर याइगु विश्वास प्वकादीगु खः।

मधेसी पत्रकार समाजया अध्यक्ष मोहन सिहं न थुकिया विषय सकस्यूगु खःसा गन न सम्बोधन यानाच्वंगु मदु धका धयादीगु खः। ज्याझ्वलय् दबूया यल शाखाया कोषाध्यक्ष सुनील वज्राचार्य न सुभाय् बियादीगु खः।

Categorized in राष्ट्रिय