समस्या मदुगु मखु, तर जि सुम्क च्वनेमखु, न्ह्यानां तुं च्वने
थिंलाथ्व द्धादशी ११४० (दिसेम्वर ९ २०१९)
संसार क्रिएशनया ग्वसालय् नेपालभाषा स्टार म्यूजिक भिडियो अवार्ड जुइत्यंगु दु । ग्वसाः खलकं पुसया निगूगु वाःपाखे थुगु ज्याझ्वः याय्त तयारी न्ह्यःने यंकूगु दु । थुगु ज्याझ्वःयात बिगेस्ट अवार्ड इन नेपालभाषा फिल्म इण्डष्ट्री धकाः नारा नं बियातःगु दु । थुगु अवार्डया नितिं २१गू विधाय् टप टेन नोमिनिज नं घोषणा याय्धुंकलसा जन संगीत स्रष्टा अमरराज शर्मायात, संसार मल्टिपरपोज अवार्ड ललेन्द्र शाक्ययात लिसें कलाख्यःया न्हय्गू विधाया न्हय्म्ह स्रष्टापिन्त संसार सप्तरंगी अवार्डया नं घोषणा जुइधुंकल । आः थुगु हे ज्याझ्वःया प्रचारप्रसारकथं कलाकार फुटबल ज्याझ्वः छगू यानाःलि फाइनल अवार्ड वितरण ज्याझ्वः तःजिक क्वचाय्केगु तयारी तच्वःगु दु । थ्व हे झ्वलय् अवार्डया थीथी पक्षयात कयाः, ज्याझ्वःयात कयाः संसार क्रिएशनया नायःलिसें कलाकार स्वतन्त्र संसार महर्जनलिसे लहनान्युजपाखें बिराजकाजी राजोपाध्यायं यानादीगु खँल्हाबल्हा 
 
 
अवार्डया तयारी गुलि गुकथं न्ह्याःवनाच्वन ?
 
अवार्ड धइगु धयाकथं तुरन्त याय्फइगु ज्या मखु । झीसं थुकिया चरणवद्ध ज्याझ्वः दय्कातइगु दु । उकिया झ्वलय् दकलय् न्हापां सहभागी कलाकार प्राविधिकपिन्त सहभागिताया दसिपौ लःल्हानाः सम्मानया ज्याझ्वः याना । वयां लिपा हरेक विधाया टप टेन घोषणालिसें टप टेनया दसिपौ व मेडल लःल्हाय्गु लिसें सप्तरंगी कलाकार सम्मान व मल्टिपरपोज अवार्ड घोषणा ज्याझ्वः नं याना । आः स्वंगूगु चरणया ज्याझ्वःकथं कलाकार फुटबल म्याच याय्त्यनागु दु । वयां लिपा फाइनल अवार्ड डिस्ट्रिब्यूसन ज्याझ्वः याय्गु खः । फाइनल ज्याझ्वः पुषया निगूगु वाःपाखे याय्गु जिमिगु तयारी दु ।
 
 
सप्तरंगी कलाकार अवार्ड धयागु छु खः ?
 
ज्याझ्वःया ग्वसाः ग्वय्त्यनागु संसार क्रिएशनपाखें खः । थ्व संसार क्रिएशन धइगु हे न्हू न्हूगु रचनात्मक ज्यात यानावनेत खः । अले बांलाःगु ज्याया कपि याय्गु बांलाःगु हे खँ खत । अन्तर्राष्ट्रिय अभ्यासयात झीसं लिनाः थुगु सप्तरङ्गी अवार्ड विधा नं थप यानागु खः ।
 
सप्तरङ्गी धयागु कला क्षेत्रलिसे नं सम्वन्धित खँ खः । थ्व हे खँयात लिनाः संसार सप्तरङ्गी अवार्ड धकाः न्हय्गू विधाया न्हय्म्ह कलाकारयात सम्मान याय्त्यनागु दु । अलय् मल्टिपरपोज अवार्ड दुने छपु म्येया आपालं विधाय् थःगु कला न्ह्यब्वयादीम्ह कलाकार ललेन्द्र शाक्ययात बीत्यनागु दु । थ्व विधाय् अझ थप नं जूवनेफु । थ्व लिपा हे जक सीदइ ।
 
 
धाय्बलय् फाइनल ज्याझ्वःतक थ्यनीबलय् बिधात अझ नं थप जुइफु ?
 
आः २१गू क्याटगरी जु हे जुल, अनं लाइफटाइम अचिभमेन्ट अवार्डपाखें जनसंगीत स्रष्टा अमरराज शर्मायात सम्मान याय्त्यनागु दु । संसार सप्तरंगी अवार्डया न्हय्गू अवार्डलिसें संसार मल्टिपरपोज अवार्ड नं बीगु जुल । थुकिया नापं थौंकन्हय् तिनि झीसं छगू न्हूगु विधा नं थप यानागु दु । संसार पब्लिक भ्यू अवार्ड धकाः थप यानागु विधा सामाजिक संजाललिसे स्वानाच्वंगु दुसा थुकी कलाकार, गैर कलाकार सकलें दुथ्याइ । झीसं अवार्डया छगू फेसबुक फ्रेम दय्कागु दु । फेसबुकय् थःगु प्रोफाइल पिक्चरय् थुगु फ्रेम तयाः सुया दकलय् आपाः लाइक वइ, वय्कःयात थुगु अवार्ड बीगु जुइ । 
 
 
थ्व दक्वं याय्बलय् ३१गू ला थ्यँ हे थ्यन । उकिया नापं अन्तर्राष्ट्रिय अभ्यासय् दुगु खँ खः, जज प्यानलपाखें जुरी च्वाइस अवार्ड बीगु अधिकार नं दु । व हे संस्कृतियात झीसं थुखे नं निरन्तर याय्फु । न्हय्म्ह जजपिनिपाखें न्हय्गू जुरी च्वाइस अवार्ड नं थप जुइफु । लिपांगु ज्याझ्वःतक थ्यनीबलय् मेमेगु विधा थप जुइगु अवस्था दु ।
 
 
थुलिमछि विधा छाय् ले ?
 
झीगु नारा हे विगेस्ट अवार्ड इन नेपालभाषा फिल्म इण्डष्ट्रि । नेवाः संकिपा ख्यलय् दकलय् तःधंगु हे ज्याझ्वः याय्गु योजना दु झीगु । मेमेगु अवार्ड थें नियमितकथंया ज्या जक यानाः ला बिगेस्ट जुइगु खँ मन्त ।
 
छपु म्यूजिक भिडियो तयार जुइत गुलि ज्या जुइ, गुलिसिया ल्हाः दइ स्वयादिसँ ले । दकलय् न्हापा रचना जुइमाल, उकी लय् तय्माल । व धुंकाः रेकर्डिङ कक्षया ज्या वइ । संगीत संयोजन याइ, हालीम्हेसिनं हाली, रेकर्डिस्टं रेकर्डिङ याइ । वयां लिपा मिक्सिङ याइ । थुलि याय्धुन अडियो तयार जुल । अझ भिडियोया नितिं निर्देशक, मोडल, मेकअप, लाइट, ड्रेस, डान्स डाइरेक्टर, कोरस डान्सर, छायाङ्कन व धुंकाः स्टुडियो दुने फुटेज क्याप्चर, भिज्युअल एडिटिङ, कलर करेक्सन । थुलि यानाः म्ये तयार जुइधुंकाः नं पब्लिसिटिया सामग्री । थुलिमछिसिया मेहनतं छपु म्यूजिक भिडियो तयार जुइ । छपु म्यूजिक भिडियो तयार याय्त सुनां सुनां योगदान बी, उपिं सुं नं त्वःमफीमा, सकसिगु योगदानया कदर जुइमा, मूल्याङ्कन जुइमा धइगु ल्याखं नं दक्वं हे क्याटगरीइ अवार्ड बी त्यनागु खः ।
 
 
थुगु ज्याझ्वः दँय्दसं हे यानावनेगु खः ला ? मखुसा ग्वःदँय् याय्गु ग्वसाः खः ?
 
खय्तला अवार्ड धइगु दँय्दसं हे याय्माःगु नियम खः । झीगु योजना नं दँय्दसं याय्गु हे खः । झीगु कुतः थ्व हे जुइ । तर थुकी दँय् ग्वःगु म्यूजिक भिडियो निर्माण जुयाः पिदनी धइगु नं खँ जुइ । आः झीसं मेगु दँय् ज्याझ्वः याय्बलय् पुलांगु म्यूजिक भिडियोत ला काय्मजिल, दछि दुने पिदंगु जक काय्माल । आः दँय् गुलि म्यूजिक भिडियो निर्माण जुयाः पिदनी, उकी हे थ्व खँ बः
 
 
काइगु जुल । दछिइ छक्वः हे याय्गु अवस्था मदुसां निदँय् छक्वः ला पक्कां यानावनेगु जुइ ।
 
नेवाः ख्यलय् न्हापा जूगु अवार्ड लिसें मेमेगु ज्याझ्वःत नं निरन्तर जुइफुगु खनेमदु । निरन्तरताया सवालय् छिं खनागु समस्या छु खः ?
अवार्डया खँ ल्हाय्बलय् थुकी लय्ताइपिं स्वयां तं चाइपिं आपाः दयाच्वनीगु जिं खना । अवार्ड त्याकूपिं मनूत लय्ताइ, मलाःपिं तंचाइ । आः तंचाइ धकाः सकसितं अवार्ड बीगु ला खँ जुइमखुत । आः ब्वति काइपिन्सं नं छगू खँ थुइका बी माल कि जिं छगू धेंधेंबल्लाय् ब्वति कयागु खः, जि त्याय् नं फु, मत्याय् नं फु । थुगुसी अवार्ड मलाःसां लिपाया पालय् त्याके धइगु आशा तयावनेमाः, निराश जुइमज्यू ।
 
आः झीसं थजाःगु खँ ध्यानय् तयाः झीसं अवार्ड त्याकामि ल्यय्गु योजना दु । जजपिनिगुपाखें नं ल्यय्गु जु हे जुइ, लिसें प्रविधिया विकास थुलि जुइधुंकाः झीसं उकियात नं छाय् मलीगु ? अनलाइनपाखें वा एसएमएसपाखें सर्वसाधारणं नं थः यःम्ह कलाकार ल्यय्फइ । दर्शकया मत नं ल्याःखाय्गु जूगुलिं विवाद म्हो जुइला धइथें ताः ।
 
 
थपाय्मछिधंगु ज्याझ्वः यानादीत्यंगु दु, ४, ५ लाखं जुइगु ज्याझ्वः ला पक्कां खइमखु । आर्थिक व्यवस्थापनया पक्षय् गजाःगु योजना दु ?
 
पक्कां खः, थुकी खर्च ला आपाः हे दु । अवार्डया ट्रफि जक हे डेढ लाख धइथें खर्च जुइगु अवस्था दु । ल्यू ज्याझ्वः निगू ला सिधय्केधुन, छगू अझ ल्यू ज्याझ्वः याय्मानि । थ्वलिसें मेमेगु दक्वं याय्बलय् लगभग २० लाखया बजेट अनुमान यानातयागु दु । थुलिमछि थम्हं हे खर्च यानाः ज्याझ्वः याय्त ला जिके नं दुगु मखु । तर जितः ग्वाहालि यक्व हे दु । स्थानीय तहपाखें, थीथी व्यापारिक संघसंस्थापाखें, स्थानीय संघसंस्था आदिया ग्वाहालिं थुगु ज्याझ्वः तःजिक हे क्वचाइगु खनेदु । ज्याझ्वः बिचाः यानाकथं तःजिक हे जुयावन धाःसा ग्वाहालि धयागु लिपातक नं दयाच्वनी । ज्याझ्वः छक्वः जक याय्गु ल्याखं वंसा थाकुइ तर लिपातकया बिचाः यानावन धाःसा थन ग्वाहालि याइगु ल्हाः दु ।
 
 
छि थःगु स्वास्थ्यया खँय् नं संघर्ष यानाच्वनादीम्ह, मेरुदण्डया ट्यूमरया निगूगु अपरेशनया तयारी यानाच्वनादीम्ह । थजाःगु अवस्थाय् थपाय्मछिधंगु ज्याझ्वः याय् थाकुयाच्वंगु मदुला ?
 
समस्या ला खः, तर रोग मखु धाय् जिं थ्व ट्यूमर । प्यदँ ति न्ह्यः जिगु न्हापांगु अपरेशन जूगु खः । आः वयाः हाकनं निगूगु अपरेशन याय्माःगु खनेदत । आः थ्व समस्या ला दु तर समस्या धकाः सुम्क च्वनेगु जुइमखु । च्वंसा जि मफु, जितः ट्यूमर दु धकाः छेँय् द्यनाच्वंसा ज्यूगु खः । तर अथे छेँय् द्यनाच्वन कि मनू रोगी जुइ बरु । समस्यालिसे ल्वानाच्वनेमाः, समस्यां रोगया रुप काय् फइमखुु । जि न्ह्यज्यानां तुं च्वने । छुं छुं ज्या धयाथें धाःगु इलय् मजुइफु, भचा उखे थुखे जुइफु तर जि दी मखु । जितः थाकूगु नं अनुभव मजू ।