नेवाः जाति, भाषा, धर्म, संस्कृति ख्यलय् मचा ल्याय्म्ह बैंसंनिसें मद्दिक योगदान यानादीम्ह समाजसेवी देवबहादुर डंगोल २०७७ साल कार्तिकया १ गते थ्व संसारं बिदा जुयादीगु दु । बौ न्हुच्छेराज डंगोल व मां चिरिमैं डंगोलया कोखं वि.सं. १९९३ फागुण शुक्ल त्रियोदशी खुन्हु जन्म जुयादीम्ह समाजसेवी डंगोल यल जिल्लाया ऐतिहासिक खोना देसय् जन्म जुयादीम्ह खःसा वयकः खोनाय् मन्त्री कुनामं नांजाःम्ह खः ।

 

‘शिक्षा हे समाजया जः खः’ धैगु सिद्धान्त ज्वनाः पलाः छिनादीम्ह वय्कलं रुद्रायणी माध्यामिक विद्यालय सञ्चालक समिति व युवा प्रतिभा विद्या मन्दिर मा. वि. निर्माण समितिया अध्यक्ष जुयाः पलिस्था यानादिल नापं न्ह्याकेत तःधंगु योगदान यानादीगु खः । गुठी जिर्णाेद्वार एवं निर्माण समिति व भक्तपुर विकास परियोजनाय् निगू दशकं मयाक थीथी जिम्मेवार पदय् च्वनाः नेपाःया राष्ट्रिय सम्पदा संरक्षण व पुनःनिर्माण यायेगु ज्याय् वय्कलं तसकं महत्वपूर्णगु भूमिका म्हितादीगु खः ।

 

वि.सं. २००८ सालं किसान संगठनया सदस्य जुयाः राजनैतिक चेतना थनेगु ज्याय्नं वय्कः न्ह्यचिलाः दीगु खः । खोकना गाउँ पञ्चायतया वडा सभासद, वडा अध्यक्ष व कार्यभार प्रधानपञ्च जुयाः नं तःदँ उगु लागाया विकास निर्माण व समाज उन्थानया ज्या यानादीगु खः । थुकथं हे जितापुरगन्धकुटी विहारय् नं अध्यक्ष जुयाः तन, मन, धन पानाः जग्गा चूलाकाः भवन निर्माणया नाप नापं ब्यवस्थापनया ज्या नं यानादीगु खः ।

 

भिलेज कोर खोकना, लिधंसा सहकारी संस्थाया संस्थापक जुयाः व सिकाली मन्दिर निर्माण समिति, खोकना कार्य विनायक सडक निर्माण समितिइ अध्यक्ष जुयाः सेवामूलक ज्या यानादीगु दु । लिधंसा पासा पुचः खोनाया प्रतिनिधिकथं वय्कः नेवाः राष्ट्रिय संगठन नेवाः देय् दबूया संस्थापक जः जुयादीम्ह वय्कलं न्हूदँ समारोह समिति खोनाया नायः जुयाः उगु लागाय् नेपाल सम्वत् प्रचार यायेगु ज्याय् नं योगदान यानादीगु दु ।

 

ज्यापु महागुथि यल जिल्लाया पुलांम्ह नायः जुयाः ज्यापु महागुथि नेपाः थ्व अवस्थाय् थ्यंकेत दुग्यंगु यागदान यानादीम्ह वय्कलं महागुथिपाखें लुम्विनीइ निर्माण जूगु पलिस्वां पुखू धस्वाकेत ज्याया धिसिधाःम्ह दुजः जुयाः ज्या यानादीगु खःसा श्रम व्यवस्थापनय् तःधंगु योगदान यानादीगु खः । वय्कःया योगदानयात मूल्यांकन यानाः ज्यापु महागुथिं वय्कःयात संरक्षककथं हनातःगु दु लिसें तात्कालीन प्रधानमन्त्री शुशील कोइरालांपाखें वय्कःयात महागुथिया स्वक्वःगु तःमुँज्याय् सम्मान यायेगु ज्या नं जूगु खः । सूचक दीप मण्डलीपाखें राष्ट्रिय बौद्ध पुरुस्कार व गणबहाल महाविहारपाखें धर्म विजय पदं सम्मानीत जुयादीगु दु । थुकथं हे वय्कःयात नेवाः देय् दबू, नेवाः स्वायत्त राज्य मंकाः संघर्ष समिति, ज्यापु महागुथि यल जिल्ला समिति, लिधंसा पासा पुचः, श्री रुद्रायणी स्वर्ण जयन्ती समिति, प्रेममोहन सिरपाः गुथि, पिस गार्डेन सेकेण्डरी स्कुल थें जाःगु संघ संस्थां भाषा, संस्कृति, धर्म, शिक्षा ख्यलय् वय्कलं यानादीगु योगदानयात कदर यासें तःजिक हंगु नं लुमंकेबहः जू ।

सामाजिक ख्यलय् ज्वःमदुगु योगदान यानादीम्ह वय्कः संस्कृति संस्कार संरक्षण, प्रचारय् मद्दिक्क न्ह्यानाच्वनादीम्ह खः । गुरु लाल महर्जनपाखें दिक्षित जुयादीम्ह वय्कः थः हे मूगुरु जुयाः प्यदँ न्ह्यःतिनि खोनाया परम्परागत तान्त्रिकयुक्त भिंप्याखं न्हूपुस्तायात स्यनादिल । वय्क नेवाः परम्परागत संगीत विकासय् नं मन क्वसायेकादीम्ह वयकः दाफाया खिं थायेगु, बासुरी व कार्नेस पुइगु स्यनादीम्ह गुरु नं खः ।
नेपाःया दबूप्याखं ख्यलय् बांलाःम्ह हिरोकथं नांजाःम्ह वयकःया नासलं लीक न्ह्यब्वयादीगु कला नं सदां लुमनीगु गुण खः । रामायण प्याखनय् दशरथ जुयाः, लवकुश प्याखनय् बाल्मीकी जुयाः कला न्ह्यब्वयादीगु जक मखु । वय्कलं एकादशी भिंप्याखंया नापनापं श्रवणकुमार, पाण्डव राजा,भक्तप्रल्हाद, कविरकुमार प्याखं, विशन्तर प्याखं, मधुमालती प्याखं नं मूगुरु जुयाः स्यनादीगु खः ।

नेवाः भाय्, धर्म, संस्कृति, सम्पदा ख्यलय् जः ह्वलादीम्ह देवबहादुर डंगोलया जीवनया जः सदां थ्व हलिमय् न्यनाच्वनी । भौतिक रुपं बिनावंम्ह बहुप्रतिभां जाःम्ह डंगोल छगू प्रेरणाकथं सदां लुयाच्वनी । लुयाच्वनेमा ।


 

Categorized in राष्ट्रिय