समृद्ध राष्ट्रयाया विलासी गाडी
जुजुमान महर्जन
थौंकन्हय् तसकं चर्चाया विषय जुया च्वंगु दु, राष्ट्रपतिया नितिं १८गू करोड तकाया गाडी उपलब्ध याकेगु । समृद्ध नेपाः, समृद्धि जनताया नारा बियाःन्ह्याःवनाच्वंगु थुगु सरकारया ज्यां धाःसा आः नेपाःधात्थें समृद्ध देश जुइगु खः धइगु खँय् धाःसा पत्याः याय्गु थाय् मदय्का ब्यूगु दु ।
देशया धुकू धइगु जनताया करं हे जाइगु खः । छुं छुं विदेशीदाता राष्ट्रपाखें वइगु खःसाअप्वःधइथें देशयाआन्तरिक श्रोतपाखें हे मुंकेगु ज्या जुइगु खः । जनता कर छाय् पुली धइगु खँय् धाःसा नेता तय्सं गुलि च्यूताः कया च्वंगु दु, आःया सरकारपाखें राष्ट्रपतियात तसकं थिकेगु गाडी बीगु खँ स्पष्ट जूवंगु दु । छुं दिं क्वचाःगु कर दिवसया झ्वलय् प्रधानमन्त्री खड्ग प्रसाद ओलीशर्र्मां जनताया सेवा सुविधाया नितिं हे कर म्हइगु खँ धयादिसें सकलसित कर पुलेगु नितिं आह्वान यानादीगु खः ।
तर उगु आह्वानयाःगु छुं दिं लिपा हे राष्ट्रपतियात गाडी उपलब्ध याकेगु खँ पाखें प्रधानमन्त्रीं जनतायात छु् धयाच्वन व ज्या छु याना च्वन धइगु स्पष्ट जुइ त ताःई पीम्वाल । छगू थ्व बांलाःगु पक्षखः कि जनता तताःई तक भ्रमय् च्वना च्वनेमाल । अर्थात सरकारया ज्या व खँ छु खः धइगु खँय् । गुगु ज्या जुल, व तसकं हे दुःखया खँ खः । उकिया हे अभिब्यक्ति जुइमाः कि राष्ट्रपतिया “म्हितेगु गाडी” न्याना बीगु नितिं छथ्वः ल्याय्म्हत पशुपतिइ च्वनाः धेबा फ्वना च्वंगु लू ।
थुगु खँयातकयाः राष्ट्रपति थःम्हेस्यां नं बिचाः याय्माः गु खःकि जि थुकिया नितिं लायक खः वा मखु । थजाःगु ज्यां थःगु ब्यक्तित्वय् गजाःगु लिच्वः लाकि? अले नेपाः या गौरवशाली पार्टी कथं धस्वाना च्वंगु पार्टीया उपाध्यक्ष तकं जुयादी धुंकूम्ह छम्ह कम्यूनिष्ट (?) नेतां थजाःगु ज्या याय् गुलि तक ल्वःगु खः? राजतन्त्र दुगु इलय् जुजुपिन्सं जनताया सम्पत्ति लुटे यानाच्वन, गनं सवारी जुलधाःसा जनताया दुःख बीगु बाहेक मेगु ज्या मजुल धकाः विरोध जक मखु, सशक्त सः ल्ह्वनाःविरोध याःपिं नेतात आः वयाः जनतायाके कर कयाः झिंच्यागू करोड तका तूगु गाडी गल धाःसा जनतां छु धाइ? थुखेपाखे बिचाः यानाः थजाःगु निर्णययात कयाः अस्वीकार याय्माः गु खः । तर आःतक नं थुकियात कयाः मौन च्वनेगु धइगु थुकिया समर्थन हे याःगु खः धइगु जनतां थुइका च्वंगु दु ।
वि.सं. २०६२÷६३या जनआन्दोलन लिपा नेपाः संघीय लोकतान्त्रिक गणतन्त्र देश कथं स्थापना जुइधुंकाः देश धात्थें समृद्धिपाखे न्ह्याः वनीगु आशा जनता याःगु खः । अझ वंगु चुनावपाखें कम्यूनिष्ट पार्टीयात दुई तिहाई मत बीधुंकूगु अवस्थाय् विकास निर्माणं गति काइ धइगु यक्व हे आशा जक मखु, स्वयम् प्रधानमन्त्रीं समृद्धिया नारा बियाः ज्या न्ह्याकूगुलिं यक्व हे विश्वस्त नं जूगु खः । तर विडम्बनाया खँ, देश गुखेपाखे न्ह्यानाच्वंगु दु । गनं पुलांगु राजतन्त्रया हे गौ जक कयाच्वंगु मखुला? शासक ला हिल, तर पुलांगु हे सोचं (राजतन्त्र) हे जक ज्या यानाच्वंगु जक मखुला ? आदि इत्यादि न्ह्यसःजन मानसय् ब्वलनाच्वंगु दु ।
