सम्पदा दयेकेत येँ मनपा तयार दु : मेयर शाक्य
नृपेन्द्रलाल श्रेष्ठ | गुंलाथ्व दशमी ११३९ (अगष्ट १० २०१९)
येँ महानगरपालिकाया मेयर विद्यासुन्दर शाक्यं महानगर दुने गन न बहाः, बही, देगः, फल्चाः नाप द्यः छेँय् व सम्पदा देयेके माःसा सुना न सुचः बिल धाःसा येँ मनपां तत्काल दयेकेगु बचं बियादिगु दु ।
नेपाल खड्गी सेवा समितिया ग्वसाः ग्वःगु छगु अन्तक्र्रियाय् ज्याझ्वः जुगु दु । उगु ज्याझवलय् येँ मनपाया मेयर शाक्यं महानगरपालिका जनतां पुगु करपाखे न्ह्याना च्वंगु निकाय जुगुनि जनताया सार्वजनिक सम्पत्तिया पुनर्निर्माण एवं संरक्षण यायेगु हे प्रमुख दायित्व जुगु धका मेयर शाक्य धयादिगुु खः ।
आः विवाद वया च्वंगु गुठी विधेयक सरकारं लित काये धुकुगु अवस्थाय् थः पिनिगु लागि गज्यागु उगु बिधेयकय् व्यवस्था यायेमा नाप गुठीयारपिनिगु स्पष्ट अवधारणाय् वयेमाः धका न धयादिगु दु ।
गुथि विधेयकबारे सम्बद्ध गुठियारसपिन्स तयार याइगु अवधारणायात सरकारयात थ्यकेगु समन्वयकारी भूमिका थम्ह थ्यका बिउगु जुइ धकाः मेयर शाक्य धयादिगु खः ।
उगु ज्याझ्वलय् येँमनपाया सम्पदा तथा पर्यटन समितिया संयोजक नाप १८ वडाया अध्यक्ष न्हुछेकाजी महर्जनं येँ महानगरपालिका थःगु मातहतया सम्पदा पुनर्निर्माण यायेत ग्वाहालि
यायेत इनाप न यानादिगु दु ।
ज्याझ्वलय् नेपाल खड्गी सेवा समितिया अध्यक्ष अंजिता खड्गीं खड्गी समुदाय न न्ह्याका वया च्वंगु जात्रापर्व, सम्पदा पुनर्निर्माण यायेत नाप खड्गी तयेगु गुठीया बाजं उपलब्ध यायेत मनपायात इनाप न यानादिगु खः ।
समितिया पूर्व अध्यक्ष नाप संरक्षक मनोज नेवाः खड्गीं थुगु इलय् देशय् नेवाः समुदायया पीर मर्का थुःम्ह मेगु छु हे निकाय मदुगु कारणं नेवाः समुदाय न आः येँय् महानगरपालिका मार्फत थःगु खँ राज्य समक्ष थ्यकेगु हे उपयुक्त जुइगु बिचाः तयादिगु खः । वयकलं वःगुु दँय् येँ महानगरपालिकां खड्गी समुदायया बाजं गुरु तयेत सम्मान याःगुलि मेयर शाक्ययात सुभाय् न बियादिगु खः ।
गुंलाथ्व एकादशी ११३९ (अगष्ट ११ २०१९)
