सरकारया ज्या जनतायात जानकारी याकेत प्रमपाखें सांसदतय्त निर्देशन
प्रधानमन्त्री केपी शर्मा ओलीं सरकारं याना वयाच्वंगु ज्यायात कयाः जनतायात जानकारी याकेत सत्तारुढ नेपाल कम्यूनिष्ट पार्टी (नेकपा)या सांसदतय्त निर्देशन बियादिल ।
 
थौं सञ्चरवाः न्हिनय् येँय् च्वंगु संसदीय दलया मुँज्याय् पार्टी नायःतकं जुयादीम्ह ओलीं परिवर्तन विरोेधीतसें सरकारयात कयाः जनताय् भ्रम न्यंकाच्वंगु नं धयादिल । प्रधानमन्त्री ओलीं कानून दयेकेगु व विकास निर्माणया ज्याय् सरकारं ध्यान बियाच्वंगु खँय् जनतायात जानकारी बीमाःगुलिं जनताया दथुइ वनाः सांसदतसें सरकारं यानाच्वंगु ज्यायात कयाः जानकारी याकेमाःगु धयादिल ।
 
थ्व हे झ्वलय् प्रधानमन्त्री केपी शर्मा ओलीं संसदीय समितिपाखें ग्वाहालि मयाःगुलिं नं सरकारयात ज्या यायेत थाकुयाच्वंगु कुंखिनादिल । 
 
अथे हे, नेपाल कम्यूनिष्ट पार्टी (नेकपा)या मेम्ह नायः पुष्पकमल दाहालं नं प्रतिकृयावादी तत्व थःपिनिगु विरुद्धय् छधी जुयाः न्ह्यज्यानाच्वंगु धयादिल । वय्कलं अजाःगु तत्वयात कयाः फुक्क जानाः सामना यायेमाःगुलिं सांसदपिनिगु भूमिका अझ महत्वपूर्ण जुइगु नं धयादिल । मुँज्याय् निम्ह नायःपिन्सं जक सम्बोधन याःगु खः । 
 
संसद अधिवेशन शुरु व अन्त्य जुइगु इलय् दलया मुँज्या च्वनेगु परम्पराकथं थौं मुँज्या सःतूगु खः ।
Categorized in राजनीति