सरकारया ज्या मिलेमजू — बिजुक्छेँ
हसना लवजु, ख्वप | पोहेलाथ्व पारु ११३९ (जनवरी ७ २०१९)
नेपाल मजदुर किसान पार्टीया अध्यक्ष नारायणमान बिजुक्छेँ आःया सरकारं यानाच्वंगु ज्या छुँ नं मिलेमजु धकाः ख्वपया तचपाः त्वालय् जुगु ख्वप नगरपालिका धाँ बाजं धेधेबल्ला ज्याझ्वलय् न्ववानादिसें बिजुक्छेँ अथे धयादीगु खः ।
“थुगु सरकारं न्ह्याबलेँ हे आः आः छता खँ ल्हायेगु व अले छता खँ ल्हायेगु याना वयाच्वन अथेजुया कि ला थुगु सरकार ऐला त्वना लिगिलिगि जुयाच्वंन कि ला थुगु सरकारं छुँ हे मस्यू,” वय्कलं धयादिल । अथेजुया ख्वपवासी मिलेजुया थःथाय् बाँलागु ज्या याना वनेमाःगु अले मेथाय्च्वँपिन्सं नं ख्वपय् जुगु बाँलागु ज्यापाखें सयेका काइगु वय्कःया धापू दु ।
ज्याझ्वलय् न्ववानादिसें प्रदेश नम्बर ३ या प्रदेश सभा सदस्य सुरेन्द्रराज गोसाईं नं आःया सरकारयाके बहुमत दःसां थुगु सरकारं जनताया पक्षय् छुं नं बाँलाःगु ज्या मयाःगु धयादिल । “आः सरकारय् च्वँपिन्सँनिर्वाचनया इलय् थःपिं त्याना वयेत यक्व ध्यबा खर्च याःगुलिं आः इमिगु ध्यान भ्रष्टाचार याना जिउला गथेयाना ज्यू उबले याःगु लगानी लित कायेगुलिइ जक दु,” वय्कलं धयादिल ।
आःया प्रदेश सरकारया नं मति छता ज्या मेगु जुगु धयादिसें गासाईं नं संघियता प्रति प्रदेश सरकार बफादार मजुगु नं धयादिल । ज्याझ्वलय् न्ववानादिसें ख्वप नगरपालिकाया मेयर सुनिल प्रजापतिं ख्वप नगरपालिकां जनता केन्द्रित जुया ज्या यानाच्वंगु धयादिल ।
ख्वप नगरपालिकापाखें ख्वपय् अस्पताल, जनस्वास्थ्य, शिशु स्याहार, शिक्षानिसें कयाः जनतायात माःगु दक्व कथंया ज्या न्ह्याकाच्वंगु धयादिसें मेमेगु नगरपालिकापाखें नं थःपिन्स याःगु ज्यापाखें यक्व हे सयेकाच्वंगु खँय् वय्कलं गर्व यानादिल । तर सरकारंथःपिन्त बिइधुंकूगु गुलिं गुलिं अधिकार लित कयाः नगरपालिकाया शक्ति संकुचन यानाच्वंगु नं वय्कलं धयादीगु खः ।
ज्याझ्वलय् ख्वप नगरपालिकाया उपमेयर रजनी जोशी व ख्वपया वडा नम्बर ९ या नायः रबिन्द्र ज्याख्व नापं थीथी व्यक्तित्वंपिंस न्वानादीगु खः ।
किपाः –हसना लवजु, ख्वप
Categorized in राजनीति
