सरकारी राहत गज्यापिन्स काये फइ
लहनान्युज | चौलाथ्व नवमी ११४०, चैत्र १९
सरकारं वःगु आइतवाः कोरोना प्रभावित थीथी ख्यःया आर्थिक प्याकेज घोषणा याःगु खः ।
‘कोभिड–१९ या सम्भावित संक्रमणया कारण वःगु समास्याय् प्रभावित असंगठित थाय् या ज्यायाइपि श्रमिक वर्ग व असहायपिन्त न्हिया न्हिथं ज्यायाइपिन्त स्थानीय तहपाखे राहत उपलब्ध यायेगु खः ।
थुकिया लागि अर्थ मन्त्रालयं ‘राहतसम्बन्धी मापदण्ड’ स्वीकृत याये धुकुगु दु । स्वीकृत जुगु मापदण्ड कथं असंगठित क्षेत्रया श्रमिक धइपि न्हिया न्हिथं ज्यायाना नइपि व न्हिया न्हिथं ज्यालालारीपि श्रमिक, कामदार व मजदुरयात परिभाषित याःगु दु ।
असहायया रुपं सुनां लहिना मतपि, छेँय् मदया देगलय् च्वपि, आश्रम, धर्मशाला, गुम्बा, मस्जिद, गुरुद्वार, चर्च वा वृद्धाय् च्वपिन्त धका तोके याना तःगु दु ।
वडा कार्यालयं अभिलेख तइगु
मापदण्ड कथं राहत बिइत वडा कार्यालयपाखे अभिलेख तइ । थुकिइ पसलपाखे ग्राहकया छेँय् तक सामान ल्हइपिं श्रमिक राहत काये दइ । पर्यटक भरिया, निर्माण सामग्री भरिया, सवारी साधन लँय् अत्यावश्यक वस्तु ल्हइपि मनूत थुगु सूचीइ लाइ ।
ट्रक, टिपर, भ्यानय् चले याइपि, बुँ ज्यायाइपि ज्यामि, मजदुर व छेँय् ज्यायाइपि, मस्त व जेष्ठ नागरिकया सुसा कुससा याइीप मनूतयेसं राहत काये फइ ।
अथेहे मालबाहक सवारी तथा डेलिभरी भ्यान चलेयाइपिव सहचालक, ज्यालाय् ट्याक्सी व टेम्पो चले याइपि रिक्सा वा ठेला चले याइपि सवारी साधनया मर्मत सम्भार याइपि थुगु राहत काये फइ ।
राहतया ब्यवस्था गुलि दु ?
सरकारं छगु परिवारया दरं राहत वितरण याये त्यःगु खः । जाकि ३० किलो, दाल स्वगु किलो, चिं निगुु प्याकेट, नयेगु चिकं निगु लिटर व चिनी निगु किला राहत इने त्यःगु खः । स्थानीय तहपाखे स्वन्हुया दुने अभिलेख याना राहत इनेगु ज्या जुइ ।
