सागय् मिजं फुटबलय् नेपाःया विजयी शुरुवात
१३क्वःगु दक्षिण एसियाली कासा (साग)य् मिजं फुटबलपाखे नेपालं विजयी शुरुवात याःगु दु । 
 
मंगलबार येँया दशरथ रंगशालाय् जूगु कासाय् भुटानयात ४–० या तब्यागु गोल अन्तरं बुकाः नेपालं विजयी शुरुवात याःगु खः ।
 
नेपालयात त्याकेगु झ्वलय् कप्तान सुजल श्रेष्ठं कासाया न्यागूगु मिनेटय् न्हापांगु गोल यात । 
 
कासाया न्हापांगु हाफ १–० गोलय् हे क्वचाल सा निगूगु हाफय् ५० मिनेटय् कप्तान श्रेष्ठं हाकनं निगूगु गोल यात ।
 
६५गूगु मिनेटय् अभिषेक रिजालं नेपालयात स्वंगूगु गोल बिल ।
 
कासाया ७७गूगु मिनेटय् नेपालयात चूलाःगु फ्रिकिकयात सदुपयोग यासें मिक्छेन तामाङं प्यंगूगु गोल याःगु खः । मिक्छेनं डिबक्स पिनं थ्वाःगु बलं पोस्टया जाली थ्यूवंगु खः ।
 
साविक त्याकामि नेपालं आः निगूगु कासाय् बुधबाः सनिलय् ५ताः इलय् श्रीलंकालिसे म्हिती ।
 
 

मिसा फुटबलय् नं विजयी शुरुवात

 
१३क्वःगु सागय् मिसा फुटबलपाखे नं नेपालं विजयी सुरुआत याःगु दु ।
 
मंगलबार हे पोखराया रंगशालाय् जूगु मिसा फुटबलय् नेपालं श्रीलंकायात १–० गोलअन्तरं बुकल ।
 
नेपालया लागिं सरु लिम्बूं निर्णायक गोल याःगु खः ।
 
मिसा फुटबलपाखेया निगूगु कासाय् नेपालं बिहीबाः माल्दिभ्सलिसे म्हितेत्यंगु दु ।
Categorized in कासा