२०७८ कार्तिक १०, बुधबार

सिनाया सौन्दर्य

–सुधीर ख्वबि
 
मुसुकालं छाय्पिया 
प्याखं ल्हुल्हुं
समाधिस्थ जुइतः क्वब्वाइ
सिमा क्वसं नतुं
सुखु गंगु हः
ब्रम्हलीन जुइत  ।
 
न मोह न राग न द्वेष
लिपांगु सत्य नालेत 
छगू याउँपहः 
छगू स्वाभाविकता 
छगू प्राकृत नियम
कथहं 
सिनाया आत्मबोध यायां ।
 
सिमा छमा
म्वानाच्वनी कचाकचाय् 
हः हलय् 
छगू कालखण्डतक 
स्थीर र संयमित जुयाः
हाया वनाच्वनिगु हःया बायाय्  
चुली जाया वयाच्वंगु न्हूगु हःया नापलानाय्
स्वापू आत्मबोधया यायां ।
 
जिन्दगी धात्थें धाय्गु खःसा
सुथय् न्ह्यानाः 
न्हिनय् ल्याय्म्ह जुयाः
सनिलय् सिँपय् झासु लनी
थुकी न्हूगु खँ छु दु धकाः
अजू चाया वा दुखी जुइत 
यद्यपि खँ ध्वाथुइके फुसा 
थ्व चु मखु छुं नं ज्याभःया 
थ्व ला 
श्रीखण्ड खः मोक्षया 
सिनाया सौन्दर्य खः ।