लकस नेपालया न्याक्वःगु तःमुँज्या व झिंप्यक्वःगु दँमुंज्यां सुरजवीर बज्राचार्यया अध्यक्षताय् ९ म्हसिगु कार्यसमिति निर्विरोध ल्यःगु दु । थुगु कार्यसमितिइ उपाध्यक्ष ज्ञानीशोभा महर्जन, सचिव धर्मकृष्ण सिकर्मी, कोषाध्यक्ष रश्मिला शाक्य, सदस्यहरुमा रमा तुलाधर बज्राचार्य, सुरेन्द्रमान शाक्य (शाक्य सुरेन), राज्यलक्ष्मी बज्राचार्य, कुमारी तण्डुकार, झवेन्द्रप्रकाश भट्टराई ल्यःगु खः । संस्थाया कानूनी सल्लाहकार व निर्वाचन कमिटी संयोजक किरण शाक्यं न्हूगु ज्यासना पुचःयात शपथ ग्रहण याकादीगु खः । 

नायः सुशिला शाक्यया नायःसुइ न्ह्याःगु ज्याझ्वःया उद्घाटन समारोहय् मूपाहाँ ललितपुर महानगरपालिकाया उपप्रमुख मञ्जली शाक्य बज्राचार्यं सगरमाथा सामुदायिक सिकाई केन्द्र तल्लो तल्लुया अध्यक्ष रामबहादुर के.सी.यात लकस नेपाल बर्ष ब्यक्तित्व २०८२ देछानादीगु खःसा श्री नवजागरण युवा क्लब, पहाडे थापागाउँ व फर्सिडोल टोल विकास संस्थायात संस्थागत सम्मान यानादीगु खः । लकस नेपालं अमेरिकी संस्था आउटरिच इन्टरनेशनलया ग्वाहालिइ  सहभागितामूलक मानव विकास कार्यक्रम न्ह्याकाच्वंगु दु । थुगु कार्यक्रम न्ह्यानाच्वंगु कार्यक्षेत्रं प्रक्रियागतरुपं ल्ययाः लकस नेपाल बर्ष ब्यक्तित्व सम्मान लःल्हायेगु यानाः वयाच्वंगु खः । दकले न्हापांगु खुसी सिखर्पाका गणेशबहादुर नगरकोटीया थुगु हना देछाःगु खः । 

लकस नेपालं सहभागितामूलक मानव विकास कार्यक्रम अन्तर्गत पहाडे थापागाउँ, सिखर्पा व कोञ्ज्योसोम गाउँपालिकाया तल्लो नल्लुइ ज्याझ्वः क्वचायेके धुंकूगु दुसा थौंकन्हे हाल गोदावरी नगरपालिका वडा ४ बडिखेलया ठूलो खोला आमा समूह, वनदेवी टोल विकास संस्था, वडा नं. ६ लप्सेया लप्से टोल विकास संस्था, वडा ९ इताहिटीया इताहिटी टोल विकास संस्था, बागमती गाउँपालिका वडा ३ भट्टेडाँडाया सातकन्या सामुदायिक समूह, ललितपुर महानगरपालिका २२ वडा फर्सिडोलया फर्सिडोल टोल विकास संस्था थें जाःगु समूहनाप जानाः समुदायय् ह्यूपाः थनेगु ज्या न्ह्याकाच्वंगु दुसा कल्चरल सर्भाइभरया किपर्स अफ द अर्थ फण्डया ग्वाहालिइ नेपालभाषा व लिपि प्रवद्र्धन परियोजना न्ह्याकाच्वंगु दु, गुकिं नेपालभाषा, प्रचलित नेपाल लिपि व रञ्जना लिपि स्यनेज्या न्ह्याकाच्वंगु जुलसा स्यनामि प्रशिक्षण बीगुनापं लिपि वर्णमाला व नेपालभाषा ब्याकरण सफू पिथनेगु व लिपि कासा यायेगु ग्वसाः ग्वयाच्वंगु जुल । 

 

Categorized in राष्ट्रिय