छुं दिं न्ह्यःनिसें मदिक्क वा वःगुलिं वःगु खुसिबाः व चलखं यानाः लिच्वः लाःपिन्त केन्द्रीय सरकारं स्थानीय सरकारपाखें राहत इनेगु क्वःछ्यूगु दु ।

 

गृहमन्त्री रामबहादुर थापाया अध्यक्षताय् थौं सञ्चरवाः च्वंगु केन्द्रीय विपद् व्यवस्थापन कार्यसमितिया मुँज्यां प्रदेश सरकारलिसे समन्वय यानाः जिल्ला व्यवस्थापन समितिपाखें स्थानीय तगिंमं फुक्क राहत इनेगु क्वःछ्यूगु खः ।

 

मदिक्क वा वयाच्वंगु हुनिं देसया थीथी जिल्ला डुबानय् लाःगु दु ।

 

कार्यसमितिया मुँज्यां राहत इनेगु ज्यायात व्यवस्थित व प्रभावकारी दयेकेत प्रदेश सरकारया समन्वय दइकथं स्थानीय सरकारपाखें हे राहत इनेगु क्वःछ्यूगु गृहसचिव प्रेमकुमार राईं जानकारी बियादीगु दु । खुसिवाः व चलःया हुनिं दकलय् अप्वः क्षति जूगु प्रदेश नं. १ व २ स उद्धारया नितिं हेलिकप्टर तयारी अवस्थाय् तयातःगु गृहसचिव राईं जानकारी बियादिल । वा वयेगु मद्यूसा अझ अप्वः क्षति जुइफइगुलिं माःकथं सजगता नालेत नं सरकारं इनाप याःगु दु ।

 

भारतं सीमा क्षेत्रय् दयेकूगु बाँधया हुनिं दँय्दसं नेपाःया अप्वः धइथें जिल्ला डुबानय् लायेगु याः । भारतया हे हुनिं दँय्दसं वइगु तराईया जिल्ला डुबानय् लाःसां नं समस्या ज्यंकेगु दीर्घकालीन उपाय धाःसा नालाकाःगु मदुनि ।

 

प्रदेश व स्थानीय तगिंपाखें सर्भेतकं मयासे लाथेपाथे सतक विस्तार याइगु हुनिं नं थीथी थासय् दुगु लँय् चलः वनीगु नं राईं धयादिल । छुं नं संरचना दयेकेगु इलय् अनया भौगोलिक अवस्थायात ध्यानय् तयाः दिगो जुइकथंया संरचना दयेकेगु खँय सम्बन्धित निकायपाखें बिचाः यायेमाःगु वय्कःया धापू खः ।

 

खुसिबालं पूर्व–पश्चिम राजमार्गया महोत्तरीया ताँ चुइका यंकूगु इलय् यातायात पूवंक हे प्रभावित जूगु दु । अथे हे, ओखलढुङ्गा, खोटाङ, भोजपुर, तेह्रथुम, म्याग्दी, बेनी, जोमसोम, मनाङलिसेंया लँ अवरुद्ध जूगु दु । अथे हे, रौतहटया अप्वः धइथें थाय् स्वापू त्वाःदःगु दु ।