स्वनिगःया जनप्रतिनिधिपाखें गृहमन्त्रीयात स्वनिगःया नाका सिल यायेत इनाप
बिराजकाजी राजोपाध्याय | २०७७ जेठ १, बछलागा सप्तमी ११४०
उपत्यका नगरपालिका फोरमया पदाधिकारीतयसं गृहमन्त्री रामबहादुर थापा वादलयात नापलनाः स्वनिगलय् जुयाच्वंगु वयेवनेयात कडाई यायेत माग याःगु दु ।
थौं मन्त्रालयस गृहमन्त्रीया अध्यक्षताय् मन्त्रालयया सचिव, स्वंगुलिं जिल्लाया प्रमुख, स्वंगुलिं निकायया सुरक्षा प्रमुखलिसें स्वनिगःया थीथी नाकाया स्थानीय तहया प्रमुखया मंकाः वैठकय् स्वनिगःया जनप्रतिनिधिपिन्सं थथे सुझाव ब्यूगु खः ।
छम्ह निम्ह सुलाः स्वनिगः दुहांवल व वयाके कोरोना संक्रमण खनेदुबलय् मेपिं सलंसःया परिक्षण यायेमाःगु अवस्था वइगु व उकिं राज्यया लखौँ धेबा खर्च जुइगु जूगुलिं संक्रमण न्यंकेमबीत सचेत जुइमाःगु प्रति नं जनप्रतिनिधिपिन्सं वैठकय् सुझाव ब्यूगु खः ।
गृहमन्त्री थापायात स्वनिगःया नाकाय् जक मखसें उपिं वइगु प्रस्थान विन्दुनिसें हे वयेवनेयात पनेगु खँ कडाइ लिसें पूर्णरुपं पालना याकेगु लकस दयेकेत इनाप यानागु कामपा प्रमुख शाक्यया धापू खः ।
अत्यावश्यक ज्याया लागिं स्वनिगलय् वयेमाःपिं मनुखं नं थः वयेगु पालिका व जिल्ला प्रशासनयात अनिवार्य जानकारी याकेगु व्यवस्था यायेत नं इनाप यानागु शाक्यया धापू खः ।
‘मन्त्रालयं पास बीगु स्वनिगलय् हयाः त्वःताबीगु, व धुंकाः वडाध्यक्ष–सदस्यत उमित माः जुइमाःगु बाध्यताया हुनिं तःधंगु समस्या जूगु दु’ शाक्यं धयादिल । ‘लकडाउनया उल्लंघन यासें सुलाः स्वनिगलय् दुहांवइपिं व हइपिं न्ह्याम्हेसित नं कानुनी दायराय् हयाः कारवाही यायते सुझाव बियागु दु ।’
लालाःथे पास बीगु ज्यायात निरुत्साहित यायेत सुझाव बियागु नं शाक्यं कनादिल ।
नगरपालिका फोरमया सुझावप्रति गृहमन्त्री सकारात्मक दुगु शाक्यं जानकारी बियादिल ।
बैठकय् ख्वप नगरपालिकाया प्रमुख सुनिल प्रजापतिं स्वनिगलय् लकडाउन छ्वासुकेबलय् कोरोना संक्रमणया जोखिम अप्वयेफुगु धासें घना बस्ती दुगु स्वनिगःयात सुरक्षित तयेमाःगुलिइ बः बियादिल ।
‘सरकारं नेपाल लिहांवःपिं दक्वं नागरिकया पूवंक तथ्याङक तयेमाः । उकिया नापं भारतं वइगु फलफुल, तरकारी लिसेंयात पनाः स्थानीय उत्पादनय् बः बीत सुझाव बियागु दु’ प्रजापतिं धयादिल ।
पूर्व उच्च पदस्थ पदाधिकारी व ततःधंगु उद्योगय् खटे याःपिं सुरक्षाकःमियात सीमा सुरक्षाय् खटे यायेत नं सुझाव बियागु प्रजापतिं धयादिल ।
बैठकय् जनप्रतिनिधिपिन्सं स्वनिगः संघीय राजधानी तकं जूगुलिं स्थानीय तगिमं क्वारेण्टाइन दयेकेबलय् मापदण्ड लिसेंया समस्या जुइफुगु धासें क्वारेन्टाइन दयेकेत संघीय सरकारयात हे इनाप याःगु खः ।
बैठकये येँ महानगरपालिकाया प्रमुख शाक्यलिसें यल महानगरपालिका, ख्वप नगरपालिका, चन्द्रागिरी नगरपालिका, तारकेश्वर नगरपालिका, तोखा नगरपालिका, शंखरापुर नगरपालिका, दक्षिणकाली नगरपालिका व सुर्यविनायक नगरपालिकाया प्रमुखतय् ब्वति दुगु खः ।
स्वनिगःया निगू महानगर व १६ नगरपालिकाया मेयर–उपमेयरतय् मंकाः संस्था उपत्यका नगरपालिका फोरमं सरकारयात थ्वयां न्ह्यः नं तःक्वः हे स्वनिगः दुहांवयेगुलिइ कडाई यायेत माग यानावःगु दु ।
Categorized in राष्ट्रिय
