स्वनिगलय् न्ह्यानाच्वंगु निषेधाज्ञायात कायम हे, ब्वनेकूत अन्योलय्
ञंलाथ्व एकादशी ११४१, असोज १ शुक्रवाः
स्वनिगलय् न्ह्यानाच्वंगु निषेधाज्ञायात असोज १ लिपा नं कायम हे तइगु जूगु दु ।
स्वनिगःया स्वंगुलिं जिल्ला प्रशासन ज्याकूया अधिकारीया समन्वय व सहमतिइ मेगु सुचं जारी मजूतल्ले निषेधाज्ञा कायम तयेगु निर्णय जूगु खः । स्वास्थ्य सुरक्षाया दक्वं मापदण्ड पूवंकाः आर्थिक ज्याखँलिसेया क्रियाकलाप न्ह्याके फइगु कथं थ्वयां न्ह्यः आदेश जारी याःगुलिइ उकियात निरन्तरता बीगु निर्णय जिल्ला प्रशासन ज्याकूतय्सं याःगु दु ।
आदेशय् अनावश्यक रुपं मनूत मुनेत, भिडभाड यायेत, सभा, जुलुस यायेत, जात्रा महोत्सव अले भ्वय् आदि न्यायेके न्यायेकेबी मदइगु धाःगु दु । सर्वसाधारण मनू, पुचः अले संस्थालिसेंया निकायं आर्थिक, सामाजिक अले व्यावसायिक ज्याखँ न्ह्याकेबलय् नेपाल सरकारं क्वःछ्यूगु स्वास्थ्य मापदण्ड पूवंक पालना यायेमाःगु येँ प्रशासनं न्ह्यथंगु दु ।
स्वनिगलय् शैक्षिक संस्थां भौतिक रुपं ब्वंके मदइगु धाःसा ब्वनेकू चायेके हे माःगु अवस्थाय् सरकारं न्ह्याकातःगु स्मार्ट लकडाउनया प्रावधान दुने च्वनाः स्थानीय तगिमं जिल्ला कोभिड–१९ संकट व्यवस्थापन केन्द्र (डिसिसिएमसी) लिसेया समन्वयस निर्णय यायेफइगु न्ह्यथंगु दु ।
अथे यायेबलय् ब्वनेकू न्ह्याकेगु विवरण व ढाँचा तयार यायेमाः । जिल्ला प्रशासनया लिपांगु आदेशं ब्वनेकू क्षेत्र धाःसा अन्योलय् लाःगु दु । स्वास्थ्य मापदण्ड व स्मार्ट लकडाउनया दक्वं प्रोटोकल पालना यानाः भिडभाड मयाःसे दक्वं व्यवसाय न्ह्याकेबीगु निर्णय जूगु थ्वयां न्ह्यःया आदेशयात कायम हे तःगु दु ।
Categorized in राष्ट्रिय
