स्ववाः लिपाः हे संसद अधिवेशन सःतल
गुंलागा द्वादशी ११४१, भाद्र २० आइतबाः
बर्षे अधिवेशन क्वचाःगु स्ववाः लिपा सरकारं हाकनं संसदया अधिवेशन सःतूगु दु ।
सरकारया सिफारिसय् राष्ट्रपति विद्यादेवी भण्डारीं थ्व हे भदौ २३ गतेया लागिं संसद अधिवेशन आह्वान यानादीगु दु । संसदं क्वःछीमाःगु बजेट अध्यादेशया तकं अलपत्र त्वःताः वंगु साउन ३२ गते हथासं संसद अधिवेशन क्वचायेकूगु सरकारं स्ववाः हे बी मलावं हाकनं संसद मुँज्याया आवश्यकता वाःचायेकूगुयात अमेरिकी मिलेनियम च्यालेन्ज कर्पोरेसन (एमसीसी) लिसेया सम्झौता अनुमोदनसलिसे स्वानाः स्वःगु दु ।
नेपाल व अमेरिका दथुइ एमसीसी सम्झौता जूगु थ्व हे भदौ २९ गते प्यदँ थ्यनेत्यंगु दु । व स्वयां न्ह्यः हे उगु सम्झौता संसदं अनुमोदन याकेगु मनंतुना सरकारया दुगु सरकारी अधिकारीतय्सं धाःगु दु । एमसीसी कम्प्याक्टया न्वकू फतिमा सुमार थ्व हे भदौ २४ गते नेपाल वयेत्यंगु दु । सुमारया भ्रमणयात नं एमसीसी सम्झौता अनुमोदनलिसे स्वानाः स्वयाच्वंगु दु ।
२०७४ भदौ २९ य् एमसीसी सम्झौता जूबलय् शेरबहादुर देउवा हे प्रधानमन्त्री जुयाच्वनादीगु खःसा सम्झौताय् ल्हाःचिं तःम्ह तत्कालिन अर्थमन्त्री ज्ञानेन्द्रबहादुर कार्की आः कानुन मन्त्री दु । सरकारं संसद अधिवेशन सःतेगु निर्णय याये न्ह्यः प्रधानमन्त्री देउवां सत्ता गठबन्धनया सहयात्री माओवादी नायः पुष्पकमल दाहाल व एकीकृत समाजवादीया नायः माधवकुमार नेपाललिसे सहलह यानादीगु खः ।
प्रधानमन्त्री देउवां दाहाल व नेपाललिसे एमसीसी पारित मजूबलय् अमेरिकां नेपालयात ब्यूगु अनुदान ग्वहालि लिहां वनेफुगु व उकिं मेगु अन्तर्राष्ट्रिय समुदायलय् नं नेपालप्रतिया विश्वसनीयता तनीगु खँय् सचेत जुइमाःगु धयादीगु खः ।
आः संसदय् १५ अध्यादेश अलपत्र अवस्थाय् दु । उकीसनं बजेट अध्यादेश हे अलपत्र लाःबलय् बजेट कार्यान्वयनय् हे अन्योल अप्वःगु दु । बजेट अधिवेशन क्वचायेकाः सरकारं दल विभाजन सम्बन्धि अध्यादेश हःगु खः ।
उगु अध्यादेश कथं माधव नेपालया नेतृत्वय् नेकपा समाजवादी व महन्थ ठाकुरया नेतृत्वय् लोकतान्त्रिक समाजवादी पार्टी गठन जुइधुंकूगु दु । तर सरकार धाःसा उगु अध्यादेशयात संसदय् यंकेगु पक्षय् मदुगु व संसद मुँज्या सःते न्ह्यः उगु अध्यादेश निस्क्रिय दयेकेगु तयारीइ दुगु सीदुगु दु ।
Categorized in राजनीति
