स्वस्थानी बाखंया विषयस बिचाः गोष्ठी जुल
लहनान्युज | सिल्लाथ्व तृतिया ११४० (जनवरी २७ २०२०)
स्वस्थानी बाखंयात कयाः येँय् बिचाः गोष्ठी क्वचाःगु दु । राजोपाध्याय समाज जिल्ला समन्वय समिति येँपाखें वंगु शन्चरबाः ‘नेवाः समाजय् स्वस्थानी बाखं’ विषयक बिचाः गोष्ठी जूगु खः ।
ज्याझ्वलय् मू वक्ता सँस्कृतिविद् महेश्वर जुजु राजोपाध्यायं स्वस्थानी धयागु हे थःगु थाय्या शक्ति धाःगु जूगुलिं हे नं थुगु बाखं झीगु हे भूमिया खः धइगु सीदुगु धयादिल । वय्कलं स्वस्थानी बाखनय् उल्लेख जूम्ह नवराजया धात्थेंया नां बन्हिराज खःगु व वयागु लावण्य देशया लाय्कू ख्वपया वानेलाय्कू खःगु धयादिल ।
तत्कालीन लावण्य देश धयागु ख्वप व सक्व खःगु दावी वय्कलं यानादिल । अथे हे टीप्पणीकार प्राज्ञ निर्मलमणि अधिकारीं प्रकाशनया हे शक्तिं भारतं नेपालयागु स्वस्थानी बाखंयात थःगु दयेकायंकूगु धयादिल ।
स्वस्थानीया बाखंत भारतया भूमिं हिन्दी भासं अनुवाद यानाः सफूत पिदनावःलिसे जनमानसय् थुगु बाखं भारतयागु थें जुयावंगु अधिकारीं धयादिल ।
ज्याझ्वःया आज्जु कनेगु झ्वलय् समाजया महासचिव बिराजकाजी राजोपाध्यायं पहिचान मालाच्वंपिं नेवाःतय्सं हे थःगु हे भूमि वा सँस्कृति खनेदुगु स्वस्थानी बाखंयात छाय् भारतीय धयाच्वन धकाः न्ह्यसः तयादिल ।
