हल्चोक आकाश भैरवया लँपु छायेगु ज्या क्वःचाल
नृपेन्द्रलाल श्रेष्ठ | गुंलागा अष्टमी ११३८( सेप्तेम्वर १७ २०१८ )
येँया वलय् जात्रा जुइगु हल्चोक आकाश भैरव, चण्डि व कुमारी (सवः द्य) स्वम्ह द्यःया ख्वाःपाःयात लँपु छायेगु ज्या क्वःचाये धुकुगु दु ।
लँपु छायेगु लागि ञंलाथ्व पारु कुन्हु हल्चोक निसे येँया मासंगल्लीइ चित्रकारया छेँ हःगु खः ।
लँपु छाय्गु ज्या येँया मासंगल्लिइ च्वंच्वनादीम्ह तेज बहादुर चित्रकारं याना वयाच्वनादीगु खः । वयकलं वंगु वि.सं. २०२८ सालं निसें मदिक्क च्वया वया च्वनादीम्ह चित्रकारं प्यंगू पुस्ता न्ह्यःनिसें थुगु ज्यायात निरन्तरता बियावया च्वनादीगु खः ।
चित्रकारयात न्हापा थुगु ज्या यायेत पारिश्रमिक कथं दच्छिया नितिं प्यंगू दोको स्यूचा व नी छधी कःनि बीगु खःसा पूजा याय्त ३३ गः धेबा बीगु खः ।
थ्यंमथ्यं ८२ दँ दय् धुंकूम्ह तेजबहादुर चित्रकारं थःम्हेस्यां थःगु इच्छां ख्वाःपाः च्वय्गु याना वयाच्वंगु खःसा थ थे ख्वाःपाः च्वयेगु इलय् दकलय् लिपा जक ख्वाःपाः च्वयेगु ज्या यानादी । ख्वाःपाः च्वयेगु झ्वलय् थः म्हेस्यां भैलद्यःया ख्वाःपाः गबलें मिखा चूलाक्क मस्वयागु खँ लहनान्युज नाप खँ कनादीगु खः ।
लँपु छाय्गु क्वचाय्काः एकादशि कुन्हु क्षमा पूजा यानाः गुथ्याः पिन्त चित्रकारपाखें ख्वाःपा ःलःल्हाय्माः । अथेहे ञंलाथ्व एकादशी कुन्हु हल्चोक हे लितयंकी ।
उगु दिनय् हे हल्चोकया आँगद्य छेँय् बिशेष पुजा न जुइ ।