२०८० फाल्गुण १२, शनिबार

हिंसाया द्वपनय् युगाण्डाया जुजुयात ज्वन

ने.सं. ११३७ कछलागा बालाचःह्रे, २०१६ नोभेम्बर २८, सोमवाः

युगाण्डाया रबेनजुरुरु क्षत्रया जुजुयात हिंसा न्यंकेत ग्वाहालि याःगु द्वपनय् ज्वंगु दु । प्रहरी व जुजया समर्थक दथुइ जूगु ल्वापुइ ५५म्ह सीगु खः । चाल्र्स वेस्ले मुम्बेरेयात हिंसा न्यंकूगु द्वपं बियातःगु दु ।

मुम्बेरेया गृहनगर कासेसेय् मिलिसिया लडाकुं प्रहरी चौकीइ आक्रमण याःगु खः । सरकारी सुरक्षा बलं जुजु मुम्बेरेया दरबारय् छापा मारेयानाः हिरासतय् काःगु खः । वय्कःयात हिंसाय् दुथ्याःगु लडाकुतय्त संरक्षण ब्यूगु द्वपं बियातःगु खः । तर जुजुं थःत बियातःगु द्वपंया खण्डन यानावयाच्वंगु दु । हिंसाया झ्वलय् १४म्ह प्रहरी व ४१म्ह लडाकु सीगु बिबिसीं न्ह्यथंगु दु ।

जुजु मुम्बेरेया ग्वाहालि यानाच्वंगु पुचलं डेमोक्राटिक रिपब्लिक अफ कंगोया सीमय् न्हूगु देय् दय्केगु योजना दय्कूगु नं युगाण्डा सरकारं द्वपं ब्यूगु दु ।

Categorized in अन्तर्राष्ट्रिय