२०८० चैत्र १६, शुक्रबार

हेटौंडाय् बसया ठक्करं निम्ह सीत

कछलाथ्व तुतीया ११४२, कात्तिक २१ आइतबाः

हेटौँडाया नेवारपानीइ शनिबाः बहनी देउसी म्हिताच्वंगु पुचःयात बसं क्यलाब्यूबलय् निम्ह सीगु दुसा च्याम्ह घाःपाः जूगु दु ।

हेटौंडां चितवनपाखे वनाच्वंगु बागमती प्रदेश ३, ००१ ख ०९३६ ल्याःया बसं हेटौँडा उपमहानगरपालिका १५ नेवारपानीइ देउसी म्हिताच्वंगु स्थानीयया पुचःयात ठक्कर ब्यूगु खः ।

घटनाय् हेटौंडा उपमहानगर १५ या सुजन विष्ट व चितवनयाम्ह प्रेम सिंह मदुगु जिल्ला प्रहरी ज्याकू मकवानपुरं न्ह्यथंगु दु । बसया ठक्करं घाःपाः जूपिं ८म्हेसित चितवन मेडिकल कलेजय् वासः यानाच्वंगु दु ।

घाःपाः जूपिंमध्ये छम्हेसिया अवस्था तच्वः दुगु प्रहरीं न्ह्यथंगु दु । बस चालकयात प्रहरीं ज्वनेधुंकूगु दु ।

घटना धुंकाः स्थानीयं बस च्याकाब्यूगु दुसा मि स्यायेत वंगु दमकलय् नं तोडफोडया कुतः यायेधुंकाः प्रहरीं लाठीचार्ज याःगु खः ।

Categorized in अपराध