ह्याउँगु नम्बर आतंक न्यंकूपिन्त ज्वन
लहनान्यूज | पोहेंलाथ्व षष्ठी ११३७ (जनवरी ४ २०१७)
सामाजिक संजालपाखें फोनय् ह्याउँगु नम्बर आतंक न्यंकूपिं निम्हेसित प्रहरीं ज्वंगु दु ।
मोबाइल फोनय् ह्याउँगु नम्बरं फोन वइगु व अज्याःगु नम्बरया फोन ल्ह्वंसा ज्यान वनीगु हल्ला याःगु द्वपनय् प्रहरीं निम्ह म्येहालामिपिन्त ज्वंगु खः । प्रहरीं पप म्ये हालामि दीपक बराइलि व प्रशन्ना पाण्डेयात ज्वंगु खः ।
केन्द्रिय अनुसन्धान ब्युरों अनुसन्धान याना वनेगु झ्वलय् थुगु कान्डय् इमिगु संलग्नता खनेदयवं ज्वंगु खः । निम्हेसिनं थःगु भूल स्वीकार याःगु नं प्रहरीं न्ह्यथंगु दु ।
म्येहालामि पान्डें थःत ह्याउँगु नम्बरं फोन वःगु स्टाटस फेसबुकय् तःगु व व हे लिधंसाय् प्रहरीं अनुसन्धान न्ह्याकूगु खः । म्येहालामि बराइलिं थःगु फोनपाखें फोन यायेबलय् ह्याउँगु नम्बर वनीगु दयेकातःगु खनेदुगु नं प्रहरीं धाःगु दु ।
सामाजिक संजालय् गुलि नं ह्याउँगु नम्बरं फोन वइगु सम्बन्धि खँ वयाच्वंगु दु, व दक्वं हल्ला जक खःगु स्पष्ट याःगु दु । थज्याःगु हल्लाया ल्यूल्यू मजुइत नं प्रहरीं इनाप याःगु दु ।
Categorized in अपराध
