१३क्वःगु साग कासा नेपालय्
लहनान्यूज सम्वाददाता | थिंलाथ्व चतुर्थी ११३७ (डिसेम्बर ३ २०१६)
ओलम्पिक काउन्सिलं १३क्वःगु दक्षिण एसियाली कासा (साग) थ्व हे वइगु २०१९ मार्च ९ निसें १८ तक्क नेपालय् ग्वसाः ग्वयेगु घोषणा याःगु दु ।
काउन्सिलया शनिबार राजधानीइ क्वचाःगु मुँज्यां कासाया मिति क्वःछ्यूगु खः । थुगुसी हे तिनि भारतय् क्वचाःगु १२क्वःगु साग समापन समारोहस हे १३क्वःगु साग नेपालय् यायेगु घोषणा जूगु खः ।
निदँया छकः ग्वसाः ग्वइगु थुगु कासा नेपालया आन्तरिक कारणं छुं ई लिपा लाःवंगु खः । थौंया मुँजयां ओलम्पिक परिषदया मू ज्याकू येँय् स्थापना यायेगु नं क्वःज्यूगु दु ।
१३क्वःगु सागय् म्ह्वतिं २० व अप्वलय् २५ कासा दुथ्याकेगु नं थौंया मुँज्यां क्वःछ्यूगु दु ।
परिषद्या मेगु मुँज्या भुटानय् जुइ ।
