१९द्वः सुरक्षाकःमिं सागय् सुरक्षा बीगु
शोभा श्रेष्ठ | थिंलाथ्व द्वितीया ११४०
१३क्वःगु दक्षिण एसियाली कासा (साग)य् सुरक्षा व्यवस्थाया लागिं १९द्वः सुरक्षाकःमि परिचालन याइगु जूगु दु ।
थौं येँय् पत्रकार सम्मेलन यासें साग सुरक्षा समितिं प्यंगुलिं सुरक्षा निकायया १८द्वः ९सः ३३ सुरक्षाकःमि परिचालन जुइगु न्ह्यथंगु खः । समिति कजि प्रहरी महानिरीक्षक सर्वेन्द्र खनालं स्वनिगः दुने १६द्वः व ल्यं दुपिन्सं पोखरा व जनकपुरय् सुरक्षा बीगु धयादिल ।
सुरक्षा संवेदनशीलता स्वयाः सिभिल वसतय् नं सुरक्षाकःमि च्वनीसा सीसीटिभीं तकं निगरानी जुइ । माः कथं सुरक्षाकःमि तने नं फइगु महानिरिक्षक खनालया धापू खः ।
खनालं विदेशं वइपिं पाहांतयत त्रिभुवन अन्तर्राष्ट्रिय विमानस्थलनिसें कासा क्वचायेधुंकाः विमानस्थलतक्क हे थ्यंकाबीगु व्यवस्थाया झ्वलय् सकसितं सुरक्षा बीगु धयादिल ।
सुरक्षा र ट्राफिक व्यवस्थापनयात ध्यानय् तयाः सागया उलेज्या व समापनया दिनय् सवारी ज्वलनय् जोर विजोर प्रणाली लागु याइगु जूगु दु । उलेज्याया दिं १५ गते विजोर व समापनया दिं २४ गते जोर ल्याःया सवारी ज्वलं जक न्ह्याके दइ ।
ट्राफिक व्यवस्थापन सहज दयेकेत फक्व सवारी म्ह्वः जक छ्यलेत नं महानिरिक्षक खनालं इनाप यानादिल ।
Categorized in कासा
