२५६३ क्वःगु बुद्ध जयन्तीया लसताय् “बुद्ध लुइके”
सुरज, लहनान्युज | बछलाथ्व स्वांया पुन्ही ११३९ (मे १८ २०१९)
म्येहालामि गंगा महर्जनया भजन म्येचाः “बुद्ध लुइके” पितब्वज्या जूगु दु । २५६३ क्वःगु बुद्ध जयन्तीया लसताय् नेपालभाषा एकेडमी हलय् जूगु ज्याझ्वलय् जनकवि दुर्गालाल श्रेष्ठया मूपाहाँसुइ उगु म्येचाः पितब्वज्या जूगु खः ।
गंगा महर्जनपाखें भजन म्ये न्ह्यब्वःसें न्ह्याकूगु थुगु ज्याझ्वलय् लोकगायक रत्न बेहोशी बज्राचार्य, म्येच्वमि वि.नन्द वैद्य, लोककवि राजभाई जकःमि, नेवाः एफ.एफ.पाखें ज्याझ्वः न्ह्यब्वयाच्वंगु अनिक मिडियाया संरक्षक श्रीराम महर्जन पाहांकथं झायादीगु खः ।
थुगु म्येचाकलय् दुथ्याःगु म्येय् रत्न बेहोेसी बज्राचार्य (निपु), अनागारिका श्रद्धाचारी (छपु), वि.नन्द वैद्य (छपु), पवन जोशी (छपु), क्रान्ति शाही (छपु) खःसा लसय् चिनादीपिं अनिल तुलाधर (स्वपु), रत्न बहोशी बज्राचार्य (निपु) , सुरेन्द्र श्रेष्ठ (छपु) खः । संगीत संयोजन यानादीपिं जूगल डंगोल, सुरेन्द्र श्रेष्ठ व सुरेन्द्र श्रेष्ठं यानादीगु खःसा म्ये आर्टोम्यूज रेकर्डिङ स्टुडियो, सूर मेलोडी, अन्नपूर्ण स्टुडियोय् रेकर्ड जूगु खः ।
नेवाः एफ.एम. १०६.६ मेगाहर्जया ग्वसालय् न्ह्याःगु थुगु ज्याझ्वः एफ.एम.या प्रवन्ध निर्देशक श्रीकृष्ण महर्जनया सभापतित्वय् न्ह्याःगु खःसा ज्याझ्वः सुरजवीर बज्राचार्यं न्ह्याकादीगु खः ।
म्येहालामि महर्जन नेवाः एफएमया ज्याझ्वः न्ह्याकामि नं खः ।
